Un añu d'humor “Pola salú mental”: Banksyastur vuelve a entamala con "Woman del Caliao" o "Será por Parres"

Visto l'ésitu de la que yera una iniciativa humorística ensin munches más pretensiones, l'autor convirtió dalgunos d'esos cartelos modificaos n'ilustraciones d'un calendariu solidariu del añu 2021 arrexuntáu pa un fin reivindicativu: “Pola Atención Primaria”. Tolo que recaudó, que fueron 2.500 euros, foi parar a iniciatives solidaries de la rexón venceyaes a l'atención sanitaria y, amás, visibilizaben el so sofitu a la sanidá pública nun momentu de pandemia especialmente duru. 

Agora esti llangreanu tien a la venta otru almanaque na que va ser la segunda agrupación de “Polas” con humor y compromisu. Esta vegada la clave ye “Pola salú mental”.

Fernando Argüelles posa colos nuevos almanaques nún de los puntos de venta, el chigre Páramo, en Xixón. Ana Rubiera

La tirada aumentó y náguase por triplicar la recaudación, que diría a proyectos bien concretos colos que cubrir “dende necesidaes d'alimentación, productos d'hixene, material escolar, bombones de butanu y un llargu etc... y revindicar con tou ello que se-y dea más atención a la salú mental. Porque nestos tiempos más que nunca ye clave lluchar por que toles persones tengan accesu de forma gratuita a la rede sanitaria de salú mental, qu'ésta tea financiada con recursos públicos y qu'ufierte calidá llaboral pa les y los trabayadores”, diz Argüelles. Por eso mesmo lleva meses faciendo charres virtuales y convocando sesiones monográfiques con espertos sanitarios nes sos redes sociales. Quier que se contemple la salú mental “non solo como les patoloxíes que conocemos; tamién falamos de salú emocional, d'abangar sufrimientos, ansiedaes, lluchar contra depresiones, circunstancies personales mui dures en munches vivencies que tenemos de xestionar perbién”.

El xuegu de palabres fundamental: "Pola salú mental"

Al calendariu axuntó les sos últimes reinterpretaciones xeográfiques. Asina que'l viaxe del almanaque del 2022 sal en xineru de “Candás cambia, Candás repara” -en referencia humorística a un conocíu eslogan publicitariu”- pa llegar n'avientu a “Grandas de Salime del grupo de wasap”. Y pente medies percuérrese “Cuando Teberga bien”, “Woman del Caliao”, “Arriondas expansivas”, “Será por Parres” y munches más localidaes.

Un añu d'humor “Pola salú mental” Ana Rubiera

Cuenta Fernando Argüelles, l'organizador d'esta maraña solidaria, que la iniciativa humorística empezó n'avientu de 2019 cuando s'animó a tunear el cartelu de Turón cola referencia “de Suchard”, que-y rondaba pela cabeza dende diba tiempu. Foi tal l'ésitu en redes que siguió alimentando la so vena irónica. Primero fíxolo n'anónimo como Banksyastur por si daquién-y ponía torgues, pero a la fin convencióse de que “esi anonimatu yera un pocu comedia”. Porque la so idea “siempre foi facer un tunéu graciosu, nada ofensivo nin vandálico; ello ye que la pintada faese con un rotulador y eso col agua y el sol acaba marcahndo”.

Los 40 puntos de venta

Los puntos venta del calendario.