El turrón cangués ruempe fronteres

De la vieya capital del Reinu d'Asturies al mundu. A lo último, tres los duros meses coles dudes de la pandemia, pudo abríse la canal de venta online pa ver de facer llegar a tolos requexos l'afamáu turrón Mabal, creáu va poco más d'un sieglu, concretamente en 1920, pol maestru pasteleru Dionisio Merín en Cangues d'Onís. Turrones y dulces que siguen ellaborándose coles sos propies formules, calteniendo un sellu calidable inconfundible pal paladar más esixente. Toa una “xoya” de la repostería artesanal. 

Visitar l'obrador de la confitería Merín, nel barriu d'El Censu, ye atopar con delles singularidaes del pasu del tiempu. Ellí, cualquier observador puede recrease, a un llau, colos saborgosos dulces navidiegos onde nun falta la “fabada” de mazapán o'l “güevu con chorizu, tocín y pataques frites” de mazapán, con una llamativa caxa rexistradora que data de los años 20 del sieglu pasáu al llau d'un ordenador portátil. Pasáu y presente d'ún de los turrones con más solera d'Asturies. 

Los hermanos José Ignacio y Dioni Remis Merín, bisnietos del fundador de Mabal, siguen fieles a la producción del conocíu turrón artesanal nes sos distintes variedaes. Tou un referente na contorna del Oriente, que, dende fai escases feches, apuesta por desestacionalizar la producción cola venta al traviés d'internet.