“Güei corrí diez kilómetros y l'entrenador díxome que lo fixera bien rápido”. Efrén García Pesquera tien 86 años y lleva corriendo desque se llamaba salir a correr, nada de running, nin siquier footing. Esos diez kilómetros faelos en poco más d'una hora y al so entrenador, que ye'l so fíu, Efrén García, con títulu d'entrenador nacional, abultó-y que yera demasiao rápido.
Rápido corrió esti veteranu llangreanu, de La Felguera, va poco más d'una selmana cuando se proclamó campeón d'España de cross na categoría de Máster-85 en Hornachuelos (Córdoba) con un tiempu de 22,16 minutos sobre una distancia de 3.700 metros. Una medaya más a sumar nel palmarés y eso que “la carrera yera mui mala, porque la metá yera baxada y la metá xubida, anque'l terrén taba perbién”, esplica'l llangreanu al que-y cuesten más les baxaes “porque tengo mieu a cayer”.
A García Pesquera gustó-y el deporte “dende guah.e” pero nun empezó a correr hasta “los cuarenta y tantos”, cuando tornó d'Alemaña nos años 70.
El llangreanu marchara a Alemaña a trabayar, “na mina, nel testil y na fundición” y ellí tuvo diez años, ocho d'ellos xugando al fútbol. “Nunca me gustó'l fútbol pero teníalo cerca casa y pa facer atletismu tenía que moveme y nun tenía tiempu”, esplica. Con aquel equipu percorrió les cuenques del Ruhr y del Rin, pero foi la cuenca del Nalón la que lu vio crecer como deportista.
Naquellos años 70 lo del deporte nun taba mui de moda asina que “en Llangréu yéremos trés los que corríemos y agora quedo yo solu”, recuerda Efrén García Pesquera, que tamién asegura que “n'Asturies nun había munchos corredores más”.
Entró a formar parte de la selección española d'atletismu de veteranos, qu'entós nun taba integrada na federación española. Les categoríes de la competición van de cinco en cinco años asina qu'agora Efrén ta na que va de 85 a 89 años, “quedamos cuatro o cinco n'España”, apunta, y reivindica, “nun nos paguen nada, nin los viaxes nin nada”. Eso sí, barre pa casa al esplicar que “a mí ayúdame un poco'l Conceyu de Llangréu”. Diéronse situaciones, en campeonatos internacionales, “en qu'a los veteranos nun nos dan el chandal si nun ganamos medaya, solo nos dan la camiseta”.
Lo del dineru o la ropa ye lo de menos, Efrén García Pesquera sigui entrenando na pista de Lada hasta que s'igüen les instalaciones de Los Llerones. Reconoz que “los años nun perdonen y hai que tener cuidáu” polo que yá nun puede entrenar tolos díes, “voi un día si y ún non, y si voi dos díes siguíos, depués fuelgo ún”. En cada sesión cuerre ente 10 y 14 kilómetros, “lo que me mande l'entrenador”, que se sumen a les decenes de miles de kilómetros que yá lleva nes piernes.
Al respective de que sía'l so fíu'l que-y marca lo que tien de facer, el veteranu yá ta avezáu, “ye un entrenador más, escagázame igual”, bromia.
Les sos distancies preferíes son los 800 y los 1.500 metros y tiénles corrío en campeonatos d'España, d'Europa y del mundu. “Va cuatro años fui a Gante (Bélxica) y traxi trés medayes de plata, en 800, en 1.500 y en cross”, recuerda. En 800 solo lu ganaron los dos primeros años, eso sí, al aire llibre, “porque en pista cubierta dáseme peor, nun lo mido bien”, confiesa.
Tampoco-y repunen les distancies más llargues. Foi campeón del mundu por equipos en 10 kilómetros en Valladolid y terceru del mundu en media maratón en Bruxes.
Efrén García Pesquera bromia colos neños del so equipu, Club Deportivo Estadio Langreo.
–¿Cuántos años tienes, Efrén?
–68, ye que soi zurdu y cuéntolos al revés.
Los guah.es yá deben de tener claro que de mayores quieren ser como Efrén.
