La Conseyería de Cultura, Política Llingüística y Turismu va entamar nos primeros meses del 2023 una web específica del patrimoniu inmaterial asturianu, que va atropar los fondos de los archivos de la tradición oral que quieran sumase al proyectu.
Amás, d'equí a poco van poder consultase al traviés de la rede conteníos sobre la cultura castreña que, en palabres de la conseyera Berta Piñán, van constituyir "un verdaderu atles de los pueblos fortificaos asturianos" y van facilitar l'accesu a les investigaciones sobre la materia.
Too eso va axuntase l'añu próximu nun gran portal web que dende Cultura esperen axudicar enantes de qu'acabe esti añu y que se va entamar en 2023 pa recoyer tola actividá de los equipamientos xunto a la información sobre'l patrimoniu, unificando asina la imaxe de la cultura asturiana.
Una web onde "van axuntase" los conteníos específicos que yá s'entamaron, como los relativos a la información sobre los xacimientos arqueolóxicos y el Camín de Santiago, a los que se van axuntar los conteníos referíos al patrimoniu inmaterial, la cultura castreña y mesmo un visor cartográficu de los bienes culturales protexíos.
Piñán anunciólo asina énte una entruga del diputáu del Grupu Mistu de la Xunta Xeneral Armando Fernández Bartolomé na Comisión de Cultura sobre los oxetivos y plazos pa desenvolver esti portal. Nesi sentíu, el diputáu anunció que se va a mostrar favorable a que los presupuestos autonómicos futuros incluyan una partida pa esi procesu de dixitalización. Un procesu que "tien la coxuntura favorable de los fondos europeos".
