Les rebaxes van xenerar 1.950 contratos n'Asturies, el 6% más qu'en 2022

La campaña de les rebaxes de xineru va crear esti añu nel comerciu asturianu un 6% más d'empléu que nel mesmu tiempu del exerciciu pasáu, cola firma prevista de 1.950 contratos, según un informe espublizáu esti día pola compañía de xestión de recursos humanu Adecco. Magar esti aumentu esperáu de la ocupación, la demanda de mano d'obra poles tiendes de la rexón va crecer un terciu menos que lo que s'espera qu'asoceda nel conxuntu español. Según l'estudiu, la campaña de grandes descuentos por fin de temporada va suponer la formalización de 202.000 contratos temporales nel comerciu español, el 9,3% más que nes mesmes feches de 2022. 

Acordies con estos datos, Asturies namá vas aportar el 0,96% del empléu que se va promover nes próximes selmanes cola temporada de saldos. Asturies asitia na banda baxa de la creación esperada de puestos de trabayu pa dar salida a la gran lliquidación de mercancía posnavideña. Namás n'Estremadura y La Rioxa l'aumentu del empléu al respeutive de va un añu va ser menor que n'Asturies, con medríes del 5,7% y 5%, respectivamente. Nel mesmu rangu qu'Asturies asitien Murcia, Canaries, Cantabria y Baleares, tamién con medríes esperaes del 6%. Madrid y Cataluña, con aumentos del 15% y 11,9%, van ser les comunidaes autónomes nes que s'espera que más se dispare la contratación. Sía que non, y magar los augurios internacionales de fuerte frenada na economía global, l'estudiu d'Adecco apunta qu'en toles rexones la contratación del sector va crecer al respeutive de lo asocedío doce meses enantes. 

Tamién s'espera que prosiga la puxanza del comerciu electrónicu, dando asina continuidá a un fenómenu que yá se verificó nos descuentos del "vienres negru" y a lo llargo de la Navidá. Pero, según Adecco, les tiendes físiques van ser protagonistes, "como ye habitual", de les rebaxes, cola consiguiente mayor presencia de consumidores nes cais.