Esto ye lo que cuesta arrendar un apartamentu na marina asturiana una selmana d'agostu

El preciu del alquiler d'un apartamentu d'ente 50 y 60 metros cuadraos en primer llinia de playa n'agostu varia n'Asturies dende los 545 euros selmanales en Tapia de Casariego a los 775 euros que se piden en Llanes o Ribeseya, según un informe publicáu esti día pola sociedá de tasación Tecnitasa, que destaca les diferencies ente l'oriente y l'occidente de la rexón. Sicasí, la forcadura de precios d'Asturies, de 230 euros, ye la más estrecha ente les comunidaes peninsulares. La mayor ye la rexistrada en Galicia, de 2.550 euros. Ye la diferencia ente los precios de La Toxa (Pontevedra), 2.900 euros selmanales, y los precios de Vicedo (Lugo), de 350 euros. 

L'estudiu apunta que los precios d'esti tipu d'agospiamientos xubieron n'Asturies ente un 3 y un 6% al respeutive del añu pasáu. Asitia na parte baxa de la forcadura l'arriendu en Navia, onde puede atopase un apartamentu por 570 euros a la selmana, mentanto que Xixón ta permediáu con 630 euros.

Nel conxuntu del país, l'alquiler n'agostu en primer llinia de playa moderó la so xuba al 3,7% asitiando en 1.055 euros a la selmana de media. En concretu, la medría media d'esti añu ye de menos de 40 euros a la selmana, pasando de los 1.016 euros del añu pasáu a los mentaos 1.055 euros. Con too y con ello, la media nacional del arriendu na marina creció un 3,75% esti añu, pero dende la pandemia xubió más d'un 27% dende los 826 euros que marcaba en 2020. 

Por comunidaes autónomes, les que más incrementaron los sos precios son Isles Baleares ya Isles Canaries, que doblen la media nacional conxuntamente con Galicia y el País Vascu. Andalucía, Asturies y la Comunidad Valenciana alzaron los sos alquileres n'agostu ente un 3 y un 6 %, mentanto que los más moderaos son Murcia, Cantabria y Cataluña, con un 3% de xuba. 

Los precios más caros en primer llinia de playa alcuéntrense en Marbella, en Puertu Banús, por 3.000 euros la selmana; en La Toxa (Pontevedra), con 2.900 euros; o en Puertu d'Eivissa (Isles Baleares), con 2.900 euros a la selmana.