DTO ANUAL 27,99€/año

Contenido exclusivo para suscriptores digitales

Con llingua propia

El silenciu invisible

La pintura pa entender la realidá

Cultura - Libros

José Ángel Gayol (Mieres del Camín, 1977) tien un sitiu acutáu ente los ensayistes de referencia na lliteratura asturiana; con propuestes que van dende’l diariu personal hasta lo conductual público y l’analís políticu internacional, la de so ye una voz esperta na reflexón sobre la cultura humanística. Después d’“Exercicios d’asturianu” (2016), “Vértigu” (2016) y “En primera persona” (2019), presenta “El silenciu invisible”, la obra cola que se fixo per segunda vez col Premiu d’Ensayu “Máximo Fuertes Acevedo”, un exerciciu que rezusmia orixinalidá y resulta de fonda solvencia intelectual: cuarenta cuadros conocíos, la mayoría de los sieglos XIX y XX, son l’antoxana de sesenta capítulos que s’ocupen de mui estremaes cuestiones d’actualidá, aviando un conxuntu col que s’ofrez una esplicación pal funcionamientu del actual procesu de comunicación, vistu dende una novedosa propuesta sintagmática qu’arranca de la llamada “Verdá esterior”–col sustantivu amosando “mayúscula irónica”–, un entamu definíu como los fechos qu’asoceden nel mundu y que solo atisbamos al traviés de la “ventana comunicacional”, que ye l’enfoque, el llendáu marcu del cuadru que d’aquella verdá nos ofrecen los autores que la versionen o la élite que la manexa, y siendo’l “conocimientu social” la información sesgada que nos llega. Alvertíos de la esposición dañina, queda’l llabor d’autoesixir opinión propia, una tarea pa la que Gayol ufierta una solución mui inspiradora: valise de les señes y les suxerencies alcontraes na pintura clásica pa saber interpretar l’actualidá.

Un procesu que cuerre a la vera de la convivencia con internet y les redes sociales ye la infodemia, ye dicir, l’escesu o la sobreabondanza d’información, rigurosa o falsa, qu’aturulla y llena de ruíu los procesos comunicativos d’anguaño: les noticies falseaes, la llucha pol guion del relatu o’l peligru de la posverdá son dalgunos de los pilancos que torguen la nuesa competencia. Al buscu d’ayuda, xurden les definiciones de pintura d’Alain Corbin: “la pallabra del silenciu” y Gotthold Lessing: “la poesía muda”, aniciu pa la idea de que l’arte pictóricu val como códigu alternativu pa esquivar la categoría de destinatariu y ganar la de receutor autónomu, identificar cuáles son les interfencies qu’empuerquen les canales, saber qué intención tien l’emisor y estudiar la situación; un elementu de reconocimientu trescendental pa ser conscientes de los posibles presugos del contestu. Contemplar un cuadru precisa d’atención y concentración y a eso nos convida esti testu; a guardanos nel arte col silenciu cómpliz que permita l’analís personal, avezando’l güeyu y l’oyíu a escudriñar la información como s’esamina’l cuadru: con silenciu reverencial, pero col ruíu del pensamientu espiertu pa que prienda l’entendimientu. Del estudiu de les curiosidaes pictóriques salen munchos de los titulares que ruxen nos últimos tiempos: traxedies humanitaries, economía, populismos, fanatismos, clima, asuntos y nomes que formen parte del mundu contemporaneu, un catálogu d’actualidá axeitáu por un pensador sollerte a los fechos qu’envereden el camín de la sociedá. L’arte, que val pa conocer la realidá y l’engañu, ye la ferramienta qu’entrena na xera d’atopar la rellación que conecta les dos estaxes; reparar nos detalles que pintaron Antonio Gisbert o Francisco Pradilla y atalantar qué foi lo qu’ellos quixeron que viéremos significa encarrerase pela sienda del conocimientu, entregase al encamientu vixente del sapere aude y cumplir asina col compromisu al que nun podemos arrenunciar: l’espíritu críticu.

Acompañáu pol talentu de pintores y pensadores, el discursu llingüísticu de José Ángel Gayol ta a l’altura del exerciciu intelectual y abelluga nuna edición prestosamente ilustrada, asina que’l placer de la llectura, el disfrute de la pintura y la ganancia del conocimientu queden satisfechos; inda más al aprender a chisbar la verdá, sin mayúscules engañoses, pero col respetu que merez l’espectador que nestes páxines se dexa guiar por un observador sobresaliente.

El silenciu invisible

José Ángel Gayol

Trabe, 230 páxines

20 euros

Cola ayuda de la Conseyería de Cultura, Política Llingüística y Turismu del Principáu d’Asturies

Compartir el artículo

stats