Nos últimos años ta dándose un cambiu na forma d’escribir narrativa n’asturianu. L’autoficción, el rellatu poéticu, el realismu suxetivu y la sátira política que dominaben la escena de la narración nel cambiu de sieglu tán cediendo terrén –de momentu sin perder l’espaciu que teníen acutáu– a formatos más populares, como la novela fantástica, la ucronía o’l thriller históricu. Nun ye que la lliteratura asturiana nun contara con noveles de xéneru, históriques, como les de Xulio Arbesú, Xandru Fernández, Esther Prieto, Antón García, Pablo Rodríguez Medina o Xulio Viejo, o criminales, como les de Xuan Xosé Sánchez Vicente, Xosé Nel Riesgo, Pablo Antón Marín Estrada o Roberto González-Quevedo. Tampoco ye que nunca s’escribieran rellatos fantásticos o de terror: ehí tán les obres de Miguel Solís, Vicente García Oliva o Adolfo Camilo Díaz p’atestigualo.
El cambiu al qu’aludía tien que ver más bien cola voluntá de facer un productu cercanu al universu multimedia, lo que se traduz nun ritmu narrativu más áxil, na creación d’histories fácilmente tresferibles a imáxenes, sosteníes polos diálogos, y na introducción de personaxes arquetípicos, menos complexos que los de la novela clásica, pero más cercanos a la axioloxía de la lliteratura tradicional. Ye una forma d’escribir más centrada na intriga que nel llinguaxe. Frente a lo que dicen los autores xóvenes que la reivindiquen –Nicolás Bardio, Adrián Carbayales…–, el cambiu nun afecta tanto al conteníu de les histories –namás hai que pensar en testos como "Khaos" d’Adolfo Camilo Díaz pa decatase d’ello– como al tratamientu que se da al discursu del narrador o a les descripciones, que na novela clásica daben pie a un desenvolvimientu artísticu del llinguaxe verbal.
Dientro del movimientu de renovación que se ta dando anguaño na narrativa n’asturianu, Blanca Fernández Quintana ye una de les figures más destacaes. La primera novela d’esta escritora, "L’home de les caparines" (2021), enmarcábase nel realismu máxicu, combinando una trama de misteriu que tenía como tresfondu la Guerra civil con elementos sobrenaturales bien suxerentes. En 2021, depués de llograr el Premiu de la editorial Radagast cola novela xuvenil "Trovadoresca", de la que voi falar darréu, fízose col I Premiu Enriqueta González Rubín cola obra "No que cinca los seres de lleenda", onde inxerta personaxes de la mitoloxía asturiana; y en setiembre d’esti añu foi la ganadora del XV Premiu Xosefa Canellada de lliteratura infantil y xuvenil pola novela "El cartafueyu d’Alquimia".
La escritura de Blanca Fernández combina los rasgos descritos arriba cola influencia de fontes lliteraries y folklóriques. El so interés, d’acordies cola obra que lleva publicada, ta n’ofrecer testos claros y amenos, de llectura fácil, aptos tanto pal públicu adolescente como pa llectores adultos con afición a la fantasía. En "Trovadoresca" llogra esti oxetivu a traviés d’una hestoria d’ambientación contemporánea y protagonista adolescente con cabida pa les pantasmes y la bruxería.
La novela cuenta los esfuerzos de Dora, la protagonista, por comprender la presencia espectral del trovador Bermudo, que se-y apaez per primera vez nel entierru de la güela, la prestixosa profesora Teodora Benavides, esperta en lliteratura medieval. Cola ayuda de la tamién medievalista Nela, discípula y amiga d’aquella, Dora entama una investigación qu’amás de tar encaminada a desfacer el conxuru que la une a Bermudo, acaba llevándola a descubrise a ella mesma a traviés del conocimientu de la xenealoxía femenina de la so familia.
Les principales virtúes de la novela son la naturalidá de los diálogos y un humor que, combináu cola fantasía, recuerda alguna de les noveles xuveniles de la desapaecida Blanca Álvarez. Ye un testu, en definitiva, eficaz nel oxetivu d’interesar y entretener, contemporaneu nes referencies feministes y LGTB que contién, y hasta didácticu por mor de les esplicaciones históriques. Con too, échase en falta, como yá asocedió na primera obra de l’autora, un desarrollu más pausáu del desenllaz; un aspectu qu’una escritora tan moza y prolífica de xuru sabrá ameyorar en producciones futures. Talentu nun-y falta.
Trovadoresca
Blanca Fernández Quintana
Radagast, 94 páxines, 15 euros
Cola ayuda de la Conseyería de Cultura, Política Llingüística y Turismu del Principáu d’Asturies
