Un ecosistema

Hai trece años escribía un artículu («El don de la invisibilidá») nel que citaba a grandes autores de la dómina y destacaba la invisibilidá a la que taba sometida la lliteratura asturiana nel mainstream cultural. Quexábame d’esa invisibilidá y, qué cafiante contradicción, casi tres llustros depués echo de menos aquella situación. Yá nun ye que nun se sepa nada d’aquellos autores yá canónicos, sinón que menos se sabe de los autores qu’espublizaron dende entóncenes. Les referencies de la lliteratura asturiana pa la ciudadanía en xeneral son autores qu’entamaron la so carrera hai décades. ¿Nun hubo autores nuevos y obres importantes nos últimos quince años, por garrar la referencia temporal clásica de la xeneración lliteraria? ¿Por qué nun se conocen los autores más nuevos de la lliteratura asturiana y, por embargu, siguen siendo referencia n’entrevistes, encuestes y medios los Antón García, Berta Piñán, Xuan Bello, Esther Prieto, Pablo Texón…? Cito dalgunos ensin ánimu de ser completu. Por supuesto, son nomes de primer nivel. Ta fuera de toa dulda. La cuestión nun ye por qué tan los que tan (porque lo merecen), sinón por qué nun tan los que faltan, si ye que falta dalguién.

Los y les autores qu’entamen a espublizar a finales de la década de los dos mil pasen una fiebre creativa que dura tres o cuatro años y qu’acaba por morrer. Escarecen d’eso que llamen «carrera lliteraria». Publiquen y desapaecen. Publiquen. Vuelven publicar y desapaecen definitivamente. Abúltame mui difícil construir una carrera lliteraria ensin un contestu extralliterariu que caltenga la emoción creadora, la tensión sentimental qu’anima a siguir escribiendo.

Tenemos la enfermedá, y agora vamos col diagnósticu. Hai una confluyencia de factores. La Xunta d’Escritores de Llanes (2004) establez, pamidea, un corte epistemolóxicu. Munchos de los autores que participaron nesta Xunta formaben yá un grupu conocíu, ente ellos y como grupu, y abeyaben al rodiu del segundu factor qu’intervién nesta ecuación: «Les Noticies». Cuido que la muerte del selmanariu «Les Noticies» esbarrumbó col espaciu de cooperación y xeneración de creatividá imprescindibles pa cualesquier lliteratura. Nun pretendo dicir que sía obligatoria la edición de periódicos pa la esistencia d’una lliteratura, pero sí ye dafechamente necesariu un espaciu extralliterariu de comunicación, puesta en valor, xeneración colectiva, creación de redes y capital social, espeyu formal y temáticu, guía de normativización, refuerzu social, apoyu emocional o motor d’espardimientu, por nomar solo dalgunes ventayes.

Algamar sonadía cuando s’espubliza una obra de valir nun ye posible ensin la tierra bono qu’apurra un terrén favoratible a entrar no que se conoz como mainstream. Prefiero esti término agora al de canon, que por ser más académicu seique necesite de la posa del tiempu pa concretase. Entiendo «mainstream lliterariu» como aquellos autores que son de conocimientu xeneral, ente’l públicu interesáu na lliteratura asturiana, ensin ser un públicu espertu o académicu estudiosu de la materia. Mainstream respondería a un etiquetaxe que pudiera facer un bibliotecariu, un llibreru, un llector habitual… Asina, la lliteratura asturiana contemporánea, tengo pa mi, ta desaparecida del mainstream social y comunicativu. Dos pegoyos esenciales de la mio argumentación: hai pocos autores con carrera lliteraria qu’entamaran nos últimos quince años y los pocos qu’hai nun formen parte del «mainstream lliterariu» asturianu (nun son conocíos pol llector mediu).

El grupu humanu que coincidió na Xunta de 2004 y «Les Noticies» como catalizador de carreres lliteraries apurrieron los espacios afayadizos p’aquellos autores. Espublizaben (como agora), pero de contino (y nesto hai diferencies colo qu’asocede anguaño) recibíen atención crítica concreta y amplia, entrevistes en «Les Noticies» (qu’ayuda a conectar col espardimientu n’otros medios de comunicación), empezaben a collaborar con un artículu o una columna toles selmanes (lo qu’engrasaba de siguío la maquinaria creativa), recibíen apoyu públicu y priváu d’otros autores… Quienes nun llegaron a picar esa puerta nun entraron nel cuartu del mainstream de la lliteratura asturiana. ¿Y esto ye grave? Paezme que sí. Muncho. Porque, una de dos, o bien nun s’asoleyó obra granible d’escritores de la xeneración posterior, o bien nun hubo un espardimientu o estudiu adecuáu d’esta dómina lliteraria. Lo primero esmolez muncho más que lo segundo, evidentemente. Quiero pensar (repito: quiero) que foi más un problema de falta de calces afayadizos pa dar a conocer ente’l llector mainstream a los nuevos escritores. Faltó esi espaciu o ecosistema al que me refería al principiu, un apartaderu que sirviera pa facer grupu, animar la escritura, proponer proyectos, debatir posiciones o querencies, atopar afinidaes... Y güei falten estudios académicos sobre esos y eses escritores qu’articulen una atención inicial de fondu.

¿El remediu? Hemos articular iniciatives extralliteraries qu’ayuden al espardimientu y sostenimientu de los y les escritores n’asturianu col envís de crear una lliteratura sólida. ¿Qué función ha tener cualquier lliteratura sólida? Ufiertar productos de calidá, orientaos al entretenimientu más popular o empobinaos a la esploración más cultista y minoritaria de les posibilidaes espresives d’una llingua o de la propia lliteratura. Sicasí, la calidá ye la base de too. Esti ye’l norte imprescindible del debate. Ensin calidá, nun hai espardimientu (solo esponer la puxarra y les miseries de la nuestra lliteratura) nin solidez (lo qu’abonaría les crítiques de los enemigos del asturianu). Tenemos que falar ente nosotros, entrar al debate, y ver la manera de construyir un nial nel qu’espoxigen suficientes carreres lliteraries que tean en disposición de promover el nacimientu d’obres lliteraries de calidá. Ye una xera conxunta y ha ser una vocación sincera.

Suscríbete para seguir leyendo