"Mutis" baxa los decibelios

El ruiu y el xaréu son de lo más avezao nes aules, sobremanera nes d’Educación Infantil. El guirigái ente l’alumnáu más mozo ye una situación difícil de llevar pal profesoráu, que ve complicao ser quien a aselar los momentos de mayor actividá nes clases. Los glayíos nun sirven porque mandar callar "nun educa", tal qu’esplicaron Marisa Fernández y Noelia González, profesores d’Infantil nel CEI Sagrada Familia de Les Vegues (Corvera) dende va 37 y 15 años, respeutivamente. "Fáennos falta símbolos por qu’apriendan a guardar silenciu", comenta. Pa ello, dende hai dos años traxeron "d’un planeta bien apartáu" a "Mutis", un pequeñu moñecu creáu a base d’un globu rellenu de farina y que-y "tien mieu al ruiu". Cuasi como por arte de maxa, l’apaición d’esti artiluxu fai honor al so nome y pon en "mute" a los alumnos, que s’avisen unos a otros pa guardar silenciu.

La midida funcionó dende’l primer momentu en que la entamaron, tal qu’esplica Fernández. "La fantasía ye lo que más ataya n’Educación Infantil", comentó la docente, en referencia a que l’alumnáu asimila más fácilmente l’aprendizaxe "per aciu de símbolos".

"Facíanos falta daqué llamativo pa nun tener que tar pidiendo silenciu costantemente. Un sofitu visual resulta perútil, porque identifiquen la figura cola aición", destaca la educadora. "‘Mutis’ ye un elementu que resultó perfeutu pa la xestión del xaciu y el silenciu", señala.

El recursu del profesoráu foi útil nos primeros díes depués de la vuelta de les Navidaes, un momentu nel que los pequeños tán "un poco más alloriaos", sobremanera nel casu de los escolinos de 3 años. "Los de 4 yá tienen amigos y ganes de vese, vienen más relaxaos", asegura. Amás de "Mutis", los próximos díes tamién van tener la presencia de dellos regalos de Navidá, lo que-yos va facer tar "más a gustu".

Pero l’ésitu de "Mutis" nun dio resultáu nes aules namás, tamién sirvió fuera d’elles. Y ye que’l centru de Les Vegues entamó, enantes de les vacaciones de Navidá, una fiesta a la qu’allegó l’alumnáu acompañáu de les sos madres y padres, que "quedaron ablucaos" col moñecu. Y ye que los profesores presentaron a "Mutis" en sociedá y esplicaron la so función, que la entamaron colos mesmos padres "pa que guardaren silenciu a lo llargo de les funciones". "Foi un ésitu, munchos quiérenlu pa en casa", señaló Noelia González.

Amás de "Mutis", el profesoráu del centru emplega tamién munches técniques pa que l’alumnáu relaxe les sos pulsaciones. Una d’elles empieza cuntando dende ún y hasta diez a un ritmu mediu. En llegando a la decena, inspiren y espiren sele. "Aposiento y respiro", indica la profesora a los sos alumnos. Darréu, la ventena d’escolares fai una nueva cuenta hasta diez, pero, nesti casu, de forma muncho más suave. Estos exercicios, diz, faen que sía muncho más cenciello empezar les actividaes y que garren meyor los conceutos que-yos pretenden enseñar.