Opinión | Parando en Villalpando

Heteropesimismo

Fatalismo afectivo

Parando en Villalpando: Heteropesimismo

Parando en Villalpando: Heteropesimismo / Pablo García

–¿Yá tamos, Isa?

–¡Qué mal rollu, Tere, qué decepción!

–Siempre que s’avera San Valentín pásate lo mesmo.

–Ye que, fía, toi farta.

–¿Farta de qué?

–De nun atopar al home fayadizu...

–¿Ves? Yá tamos.

–...De dir d’una relación a otra ensin un plan de futuru.

–Nun faigas planes, boba, dexa que la vida te sorprenda.

–Yá. Pero dame tantu mieu…

–¿Mieu? Mieu ye cuando sal l’agua frío de la ducha y tu tas n’una esquina, indefensa…

–¿Que qué, ho?

–Escucha, Isa, l’home perfectu ye solo una ilusión.

–Selo yo, Teresina, selo yo.

–¡Coime, chica, pos empieza a vivir la to vida! Mira, esti añu coincide’l día de los namoraos col miércoles de ceniza.

–¿Y qué?

–Nun sé, al meyor les posibilidaes d’echar polvos multiplíquense.

–Nun digas pijaes, muyer. ¡Qué burrona yes! Ye más difícil que nunca atopar una bona pareya.

–Claro. Ye una época compleja, Isina. Tamos toos un poco aventáos.

–Sí. Ente les apps de ligue, les redes sociales, la falta d’educación en responsabilidá afectiva y sexual…

–Claro, claro.

–...La salú psicolóxica, les xornaes llaborales, el Benidorm Fest…

–¡Ai Teresina, toi más perdida qu’un peu nun jacuzzi! Qué mal. Lo mío ye…

–Heteropesimismo, boba, ye normal.

–¿Qué, ho?

–Nun creas, que yo tamién siento esti fatalismo afectivu.

–¡Puf! Tantu matu, tantu fatu…

–Tantu cuentu col amor románticu y...

–Empieza una con un deséu real de conexón romántica, sexual, íntima. Y…

–Na.

–Pero na, eh. ¡Na de na!

–Nun hai con quien cuntar. Mentalízate. Una decepción tan grande…

–Y entá siquier que nos tenemos a nós.

–Sí, ho. Yá quixera yo que me gustaren les muyeres…

–Pa compartir, boba, comentar, rajar…

–¿Qué crees, qu’ellos nun rajen ente ellos?

–Qué va, nun-yos da la cabeza. Ellos van a lo d’ellos.

–¿El qué, ho?

–Bastante tienen con pensar nel playoff.

–¿Qué me tas cuntando?

–El modelu hetero ta a puntu del colapsu, faime casu.

–¡Calla, ho!

–Dígotelo en serio. ¿Nun tienes la sensación de que te tas perdiendo algo?

–¡Ai, Tere, nun me levantes más dolor de cabeza! ¿Heteropesimismo?

–Sí, fía, sí. Siempres que s’avera San Valentín pásate lo mesmo.

www.maxirodriguez.net