El músicu y compositor Xaime Arias presentó en Bimenes el pasáu día 25 de xineru un llibru de camientu que repasa la vida y obra d'una de les figures de rescample na hestoria de l'asturianada: Diamantina Rodríguez. Al empar, retratu, como bien conseña'l sotítulu, de la «Memoria d'un tiempu de la canción asturiana». Un llibru qu'amás llega p'arriquecer la bibliografía sobro'l xéneru más representativu de la música del raigañu asturianu y que malamente cuenta con publicaciones d'intérpretes que consultar. D'interés, los qu'apaecieron va cuantagüéi de «El Presi» (Félix Martín- Editorial Laria), «La tonada asturiana: un acercamiento musicológico», de Pieter Minden; «L'asturianada» (d'esti autor y el so hermanu Ismael Arias) o dalgunos más y dellos testos y estudios na rede; pero rapáu l'averamientu editorial a la vida de los cantantes asturianos, y por ello esti volume de la Editorial Cruz de Grado ye pa palmiar.

Hai ocho años, la figura, voz y repertoriu de Diamantina Rodríguez volvieron a garrar protagonismu cola apaición del discu «Anabel Santiago canta a Diamantina Rodríguez» con músicos de la escena folk, jazz y tradicional d'agora dando-y repasón al ricu repertoriu perclásicu d'esta señora de la canción asturiana demientres munchos años: «La mariñana», «Esti pandeiru que toco», «Arboleda bien plantada», «El que llora por amores» o, claro yé, «A la madre del mineru». Con munchos homenaxes na redolada de los sos 90 años Diamantina Rodríguez tamién dexó'l so nome pa bautizar al Muséu de la Tonada de Mieres. Esta quirosana del añu 1920 ya cumplió en setiembre los 92 años arramando rixu abondo y el llibru trata de manera cenciella, bien desplicada y direuta esti camín de llargor. Nel contracuartoriu del llibru con una semeya dalgo yeyé de la intérprete y un anunciu de Pepsi-Cola apúntase que trátase de dar conocimientu (entamando dende Diamantina) sobre'l tiempu nel que la tonada asturiana pa voz muyeril medra con la repercusión qu'apurrió por ello pa la dómina d'anguaño y pa una montonera d'intérpretes moces pero yá con experiencia afarto en concursos, certámenes y grabaciones. Diamantina Rodríguez espeyábase n'aquel entós, tiempu nel que les voces de muyer yeren minoritaries, en La Busdonga y na xixonesa Josefina Fernández, contemporánea de Diamantina que morrió con 41 años, en 1951, dempués de ganar dalgunos concursos importantes d'aquellos años. Tamién por abarcar un repertoriu ricu y plural lloñe de la propia tonada, emplegando otros ritmos y afalando en cancioneros como el de Torner, exemplu d'atrevimientu que siguió la estela de les voces clásiques amestando de manera valiente, como aquelles otres, un repertoriu novalín que supo contar col pianu como instrumentu d'acompañamientu musical rescatando asina parte d'una espresión musical creada d'esta manera pa entamar el sieglu XX por Baldomero Fernández col Maragatu y la Busdonga o Torner con Cuchichi; y Carmen Vigil cola mesma Diamantina Rodríguez años dempués. El testu tamién calcaña na importancia de too esto que valió, al traviés de Diamantina Rodríguez, pa crear escuela y llabrar un tarrén del que diba respiñar la collecha d'una xeneración novalina qu'espeyándose nesta gran intérprete tratara de ser, d'igual manera, orixinal y anovadora.

El llibru lleva en 177 páxines la entrada y tratu del tema, metodoloxía, xustificación y oxetivos del autor. El tiempu que-y tocó vivir a Diamantina cola Guerra Civil y la posguerra, la importancia de la radio y los concursos d'asturianada y la xeneración de los clásicos, los sos entamos, participaciones y los años raberos, la escuela y maxisteriu de Diamantina y les grabaciones. Semeyes curioses de dómines estremaes, remate, bibliografía y esbilla de nomes qu'apaecen componen el volume.

Y sobremanera, la discografía: «Asturias. Canciones asturianas» (1964), col Gaiteru d'Arnón; «Lo mejor de Asturias» (1965), que lleva encaxetada «Carretera de Colloto», grabada por Diamantina nel cine Principado d'Uviéu; «Gaita y voz en el triunfo de Asturias» (1969), col gaiteru mayor d'Asturies, José Remis Ovalle; «Diamantina Rodríguez» (1970), con José Remis Ovalle y su hijo José Antonio Remis al tambor, que repiten cola intérprete pa otru EP col so nome el mesmu añu y otru más d'igual títulu y añu pero nel que José Remis Ovalle toca la percusión tradicional y non la gaita, curiosamente; «Ases de la canción asturiana. 2. Diamantina» (1971), col gaiteru Chema Castañón; «El Cancionero de Torner en la voz de Diamantina Rodríguez» (1971); «La verde Asturias» (1972); «Cancionero popular asturiano» (1972), editado en casete en 1976 col títulu de «Soi asturianín», y acompañada por el pianista Agustín Argüelles; «Canciones asturianas» (1973) col gaiteru Veriña y el barítonu López Colodrón; «Canciones asturianas. Volumen 2» (1973), con Chema Castañón; «Canciones asturianas. Canciones antiguas» (1973) , con Veriña; una grabación editada en México de manera non llegal en 1978 copiada d'una grabación de Radio Asturias y que Diamantina conoció por «El Cogollu», que-y la dio nel añu 2000 porque cantaba con ella nel discu y con Chema Castañón y un pianista; «A las madres de los mineros» (1981); «Cancios de mío Asturies. Vol.1» (1981) con dos cantares y «Asturias» (1983) esbilla d'intérpretes con un cantar de Diamantina. Son estudios sobre esta discografía que lleva emcomparances, anécdotes, curiosidáes y condiciones de les grabaciones, les cases discográfiques de pesu que grababen asturianada como Hispavox o Columbia, el orixen de los cantares, camudamientos o quiénes les habíen fecho endenantes y una cantidá afarto de detallinos pa lleer con percuru y esfrutar.

Xaime Arias ye tituláu Superior de Pianu, Solféu y Teoría de la Música. Impartió clases en conservatorios y escueles de música y trabaya nel mundu del jazz, onde grabó con «Quatro Jazz Quartet» o «Xaime Arias Trío», amás de collaborar en discos y producciones d'intérpretes de tonada como Anabel Santiago, Liliana Castañón, Vital Noval, Rosario González, Ángeles González o los hermanos Marisa y Fernando Valle Roso. Tamién ye autor del rellatu picuscayu «La fiesta prau».