Xixón y Arcelor gasten casi la metá de l'agua que Cadasa suministra na rexón

Ye'l segundu añu consecutivu que'l Conceyu que gobierna Ana González s'asitia en cabeza del ranking de consumu d'agua na rexón, al sumar 14,3 millones de metros cúbicos, polos 12,55 millones que consumió la multinacional siderúrxica, qu'hasta 2018 foi'l principal veceru de Cadasa. Sicasí, el consumu d'Arcelor en 2020 foi un 30 por cientu mayor que l'añu anterior. 

Mui per detrás d'estos dos grandes consumidores asitia'l Conceyu de Siero, que consumió l'añu pasáu 5,74 millones de metros cúbicos d'agua, una cantidá asemeyada a la de 2019. Completen el quintetu de mayores veceros de Cadasa los conceyos d'Uviéu, que reclamó al Consorciu 4,16 millones de metros cúbicos (cantidá equivalente a la capacidá máxima del banzáu de Rusecu), y Carreño, que consumió 2,74 millones. Samartín del Rei Aurelio amenorgó'l so consumu de los 2,76 millones de metros cúbicos d'agua de 2019 a los 2,17 de 2020, ente que a Corvera abasteciólu con 2,14 millones. 

Asturiana de Cinc (AZSA) ye'l segundu consumidor industrial d'agua d'Asturies, con 2 millones de metros cúbicos, esactamente los mesmos que l'añu anterior. Primero d'atopar al tercer consumidor industrial, la Corporación Alimentaria Peñasanta (Capsa), con 1,4 millones consumíos, figura nel ranking el Conceyu de Llanera, qu'abonó a Cadasa 1,44 millones de metros cúbicos d'agua. Tamién consumen más d'un millón de metros cúbicos d'agua al añu Du Pont (1,14 millones) y Castrillón (1,07), mentantu qu'Avilés quedó a les puertes, pos consumió 918.500 metros cúbicos. Villaviciosa (772.600 metros cúbicos), Sotu'l Barcu (600.875), Noreña (521.000) y Gozón (505.700) son los siguientes na llista de mayores consumidores d'agua de Cadasa, na que tamién figuren otros veceros industriales: el polígonu de Silvota (354.800 metros cúbicos consumíos), Cogersa (157.500), el campu de golf de La Barganiza (59.700) y el acuartelamientu de Cabu Noval (34.500). 

Tolos veceros citaos hasta agora reciben l'agua del sistema central de Cadasa, nel que'l consumu urbanu, casi 37,5 millones de metros cúbicos d'agua, ye más del doble que l'industrial, que foi de 17,7 millones l'añu pasáu, lo que supon un 16,5 per cientu más qu'un añu primero. 

Polo que se refier al sistema occidental, el gastu d'agua asitia en 2020 en 942.600, un 1,2 per cientu menos que l'añu anterior. El Conceyu de Navia foi un añu más el mayor consumidor, con 342.700 metros cúbicos, una cantidá prácticamente igual al de 2019, siguíu de los d'A Veiga (140.600), Castropol (129.500), Tapia de Casariego (121.100), El Franco (106.200) y Cuaña (102.500).

Agua a 850.000 asturianos

El Consorciu, creáu en 1967, ye clave na xestión de los recursos hídricos de la rexón, porque suministra agua potable a los 29 conceyos consorciados de la zona central y occidental, que sumen unos 850.000 habitantes. Pero l'aportación del Consorciu nun equival al consumu total de los conceyos, una y bones la mayor parte d'ellos tienen aparte los sos propios recursos hídricos. Cadasa, poro, complementa les necesidaes que los conceyos nun algamen a cubrir por ellos mesmos. Nel serviciu del Consorciu inclúyense les funciones de captación, regulación, tratamientu de l'agua y la so conducción per arteries y ramales hasta los depósitos urbanos municipales. Amás, apurre suministru directu a los consumidores industriales. 

Les tarifes de Cadasa, qu'en 2020 amontáren el 0,8 por cientu, acordies col IPC de 2019, caltiénense anguaño, al aprobar la Xunta de Gobiernu la so conxelación por cuenta de la situación de crisis provocada pola pandemia. Les tarifes del Consorciu d'Agües d'Asturies asitien ente les más baxes d'España: 0,2420 euros por metru cúbicu de media a los entes consorciaos, 0,4007 euros a los usuarios directos y 0,8013 a los usuarios non habituales. 

Tocantes a les inversiones, el Consorciu gastó l'añu pasáu 1,84 millones en reposición de conducciones, y cuenta desembolsar esti añu 3,23 millones pa xeres asemeyaes, tantu como pa instalar nueves tomes y pa xestión de plataformes tecnolóxiques.