El tercer rescate de Duro pol Estáu: el Gobiernu va socorrer con 120 millones a la empresa

La movilización de recursos públicos por 120 millones d'euros pa salvar a Duro Felguera, aprobada esti día pol Conseyu de Ministros, ye'l tercer rescate de la compañía asturiana que va realizar l'Estáu nel postreru mediu sieglu. 

A diferencia del qu'agora se va a realizar, que ye específicu pa Duro y tien vocación de temporalidá, los dos anteriores –que se producieron ente 1966 y 1970– concibiéronse como actuaciones sectoriales, tuvieron calter definitivu y nun entrañaron el control de la sociedá Duro Felguera pol sector públicu, sinón l'asunción pol Estáu de les sos principales árees de negociu (la producción de carbón y d'aceru), dambes en situación de perdes y con problemes estructurales. 

La descomanada movilización de recursos públicos qu'entós se fixo lliberó al grupu, fundáu en La Felguera por Pedro Duro en 1857, de llastres que comprometíen gravemente la so supervivencia y dexaron a la compañía trespasar al Estáu más de 15.000 trabayadores y reorganizase como fabricante de bienes d'equipu a partir de los talleres auxiliares de que disponía dende diba décades y qu'actuara como sofitu a les sos actividaes centrales en redol de la hulla y l'aceru

La siderurxa

En 1960 Duro Felguera llevaba 103 años de producción siderúrxica desque en 1859 se prendiera'l so primer fornu altu en La Felguera. Les trés compañíes siderúrxiques decimonóniques asturianes (Duro Felguera, Fábrica de Mieres y SIA Santa Bárbara-Fábrica de Moreda) enfrentaron una lliberalización incipiente de les importaciones d'aceru tres el Plan de Estabilización de 1959 que punxo fin definitivu a la protección que supunxera l'autarquía (y consiguiente zarru de fronteres) del primer franquismu, a la vetustez y obsolescencia de munches de les sos instalaciones, a un allugamientu fabril que yá nun yera competitivu frente a les instalaciones cercanes a los puertos d'embarque (como les de la estatal Ensidesa n'Avilés) y a una atomización empresarial que yá s'intentara iguar con proyectos de fusión de la siderurxes privaes dende un sieglu primero que nunca llegaren a espolletar. 

En 1961 Duro Felguera, Fábrica de Mieres y SIA Santa Bárbara constituyeron Unión de Siderúgicas Asturianas (Uninsa), pa entamar un modernu tren de laminación conxuntu, qu'entró n'actividá en 1964. Dos años depués, dieron el siguiente pasu, pa constituyir una planta siderúrxica integral col sofitu del Estáu. Les trés empreses privaes trespasaron a Uninsa tolos sos activos siderúrxicos y 10.228 trabayadores, partíos entre Veriña, Moreda, Llangréu y Mieres. Pol so mayor tamañu, Duro asumió la mayor participación nel capital (26%) y l'estatal Institutu Nacional d'Industria (INI) suscribió'l 10%. Les perdes acumulaes y l'altu endeldamientu forzaron una ampliación de capital en 1970, que suscribió'l INI en solitariu. L'Estáu asumió asina'l 100% d'Uninsa y en 1973 enxertóla n'Ensidesa. Les antigües fábriques siderúrxiques apurríes a Uninsa baltáronse.

El carbón

La lliberación incipiente de la economía española dende 1959, la so apertura a poco y a poco a la competencia internacional, el destronamientu del carbón pol petróleu en 1960 como primer fonte enerxética primaria, la obsolescencia y dificultá xeolóxica de les esplotaciones, los elevaos costos del llaboréu y la deficiente calidá del mineral incapacitaron a les mines asturianes d'hulla pa sobrevivir ensin l'amparu d'un fortísimu proteccionismu. Les fuelgues a partir de 1962 (por causes económiques, polítiques y llaborales) añedieron incertidume y exercieron una fortísima presión sobre la dictadura. 

L'Estáu promovió en 1967 el salvamentu del sector cola creación d'Hunosa como integración de compañíes privaes. El INI apurrió'l 76,92% del capital y Duro Felguera (la mayor compañía carbonera), el 9,97%. Duro apurrió tolos sos activos hulleros, partíos pola cuenca del Nalón. La compañía daba ocupación a casi 12.000 de los alredor de 39.000 mineros de la cuenca central. 

La fusión d'empreses, l'intentu de reorganización y racionalización de les esplotaciones, y la capitalización llevada a cabu pol INI tres el decretu de la presidencia del Gobiernu pa la constitución d'Hunosa nun contuvieron les perdes. En 1970 el capital d'Hunosa amenorgó a cero p'absorber les resultancies negatives acumulaes y fíxose una ampliación simultánea. Nin Duro nin nenguna otra empresa privada aportaron y el Gobiernu impunxo al INI (pese al pronunciamientu en contra del so conseyu d'alministración) qu'apurriera'l 100% de los recursos, lo que traxo la estatalización total d'Hunosa. El plan d'empresa de 1973 almitió que yera “absolutamente imposible llograr n'Hunosa l'equilibriu de resultancies nin inclusive estabilizar les perdes”. 

Duro sobrevivió gracies a dambes socializaciones y agora precisó un tercer rescate pol grupu públicu SEPI, sucesor y herederu del INI.