Compromís reclama que l'asturianu pueda usase nel Senáu como'l restu de llingües oficiales
El plenu del Senáu aprobó esti miércoles reformar el reglamentu pa permitir l'usu de les llingües cooficiales na actividá de la Cámara Alta. Nesi sentíu, el Senador de Compromís, Carles Mulet, reclamó ampliar esti usu a les llingües tovía non cooficiales, pero si reconocíes oficialmente, como l'asturianu.
Na actualidá, les llingües cooficiales puen ser usaes nel debate de mociones y mociones consecuencia de interpelación, o nel usu d'entrugues escrites siempre que vengan acompañaes de la so traducción en castellanu. La función llexislativa o de control del Gobiernu, hasta'l momentu, tenía que facese namás en castellanu.
Col cambiu aprobáu esti día, los senadores van poder intervenir nos plenos, nes comisiones y en tola actividá parllamentaria nes llingües que tengan el calter d'oficiales en dalguna Comunidá Autónoma.
Mulet valoró que la manera meyor de permitir la presencia de les llingües propies d'Aragón, Asturies, Cantabria, Rexón Llionesa, Estremadura, Ceuta o Melilla sería avanzar na so oficialidá. "Nuna cámara territorial, tocaría permitir yá l'usu de toles llingües, pa cumplir asina col mandatu de la mesma Constitución", sentenció.
Más en N'asturianu
-
L'ingresu mínimu namás llega al 16,5% de los asturianos n'antoxana de la probeza
-
"L'absentismu llaboral algama niveles ensin precedentes", avisa la presidenta de FADE
-
L'artista asturianu Juan Fernández Álava, ganador de la bienal d'arte Casa Consuelo
-
Estos son los dos nuevos ciclos de FP que se van impartir n'Asturies el próximu cursu