El domingu 8 de mayu, a les 12.00 hores en Xixón, va presentase la novela ganadora de la edición de 2020 del Premiu Radagast de Lliteratura Fantástica. Trátase de 'Trovadoresca', segunda novela de la escritora yerbata Blanca Fernández Quintana.
La editorial asturiana Ediciones Radagast lleva yá dos años convocando'l Premiu Radagast de Lliteratura Fantástica, Ciencia Ficción y Terror. Esti premiu, l'únicu de novela n'asturianu d'iniciativa privada, convócase anualmente y pretende reconocer a la meyor novela de ciencia ficción, terror y lliteratura fantástica del añu.
Nesta segunda edición, un total de cuatro obres compitieron pol gallardón. El premiu consiste nun diploma, 300 euros en metálicu y la publicación de la obra.
'Trovadoresca' parte d'un festival de poesía oral onde la protagonista, Dora, dase cuenta de que tien un don únicu: el de poder ver y falar cola pantasma de Bermudo, ún de los trovadores más importantes que tuviera la Península (o eso diz él) y que, nun se sabe cómo, ta ehí cola so figura espectral y los sos comentarios estemporales en plenu sieglu XXI. Una novela de fantasía urbana y humor que xira alredor d'un secretu familiar.
