La cama

Llévense agora cames inmenses de dos metros d’anchu, onde la pareya puede dormir a gusto, guardando les distancies; asina pueden echase na mesma cama anque tean enfadaos, aforrando de discutir sobre quién duerme nel sofá. Dos metros o más de cama onde a nun ser que se busquen nun se van a alcontrar.

Antaño había cames más estreches, quiciabes pa poder arrimase bien y combatir el fríu n’iviernu cuando nun había calefacción nes cases y facia falta calecer los cuerpos xuntos, tamién por falta d’espaciu y otros inconvenientes, anque nel branu se pasara dalgo de calor. Daquella naide pensaba nuna cama descomanada pa nun sentir que dormía acompañáu. Inda años más atrás, nos pueblos deitábense en camastros estrechos onde por veces dormíen padres y dalgún de los fíos pequeños porque nun había cames pa toos. Agora too foi cambiando, digo que pa bien. Les pareyes tienen menos fíos, y magar que tengan que facer sitiu na cama pal gatu o pal perru, nuna cama de dos metros caben toos, gatos, perros y hasta los fíos si padecen mieos que los espierten y apaecen a media nueche a interrumpir la dormidera de los pas.

Alcuérdome cuando inda xoven, amoblando'l pisu pa la pareya, con munches ganes ya ilusión, un vecín que yá tenía años dábanos conseyos y recomendábanos poner dos cames nel cuartu, una opción pa nun estorbase mientres se duerme. Chocábanos aquellos conseyos y pa nada-y ficimos casu. Dempués de pasar tol noviazgu naguando porque llegara’l tiempu de poder "dormir" xuntos, a mi, aquelles suxerencies paecíenme una tolada d’aquel paisanu. Sicasí, agora son los espertos nel sueñu y el descansu los qu’afalen a la pareya a nun dormir xuntos; nun val yá la cama de dos metros, nin dos cames nel mesmu cuartu, lo meyor ye deitase ún en cada cuartu, al estilu de los Reis, (o eso ye lo que nos cuenten) pa evitar les molesties a la hora’l sueñu: evitar soportar ronquíos y movimientos raros, o sufrir l’insonniu del compañeru o compañera, o soportar suaños enmarañaos, y voces o esparabanes pola mor de ser mediu sonámbulu, y otres histories que suelen soceder peles nueches mientres dormimos.

Al empar, otros espertos recomienden el contautu corporal, cuanto más meyor: abrazase cuantes veces se pueda porque paez que ta probao que los abrazos disparen la oxitocina. ¿Dormir, suañar y hasta roncar abrazaos? Nun sabe una a quién facer casu.

A cierta edá, da pereza cambiar el mobiliariu y cambiar les costumes. Opino que tán dándonos demasiaes instrucciones de cómo dormir, con quién dormir, cuánto tiempu axuntase nes cames, y cómo comportanos nesi espaciu nocherniegu nel qu’amás de dormir se faen otres coses qu’agraden al cuerpu.

Los antiguos dicíen que les pareyes solucionaben los problemes debaxo les mantes. Nun me paez qu’esa creencia siga en vigor. Pero tampoco hemos facer casu dafechu al bombardéu de mandaos que nos faen nos medios y nes redes sociales, y a toles tonteríes que circulen pel mundu.

Suscríbete para seguir leyendo