Del sele silenciu

Salgo a pasiar ceo na mañanina con ganes fondes de sentir el silenciu, que m’enche l’espíritu, que relaxe cada neurona y me faiga llibre. Escueyo los requexinos más afayadizos de la ciudá, esa parte fondera de Panchón que sopla l’aire nun suspiru, La Punta onde sentase y zarrar los güeyos, La Lloca na que sentir la mar nevegar na soledá,… Quiero esfaceme del constante primir del ruíu, d’esi ruíu que nos domina y nos convierte en consumidores etenros de lo que nun necesitamos y ellos quieren que compremos.

Hasta nesos paraísos del silenciu atopo a persones que fuxen d’él, que lleven los cascos con música a tou trapu, o una emisora de radio avezada a que consumamos mentires, o van falando pel móvil siempre, siempre los mesmos seres falando con dalguien que nun s’oye. Nun somos quien nin siquier a nun coneutanos con internet, como si tuviéremos mieu a los gurriones, les gaviluetes,…, chiflar; a esa fola zumbar ente les roques; al non ruíu lliberanos d’esi consimismu fatu al que nos aten col capitalismu desaxeráu…

Soledá y sele silenciu son parte de la revolución a esti mundiu alloquecíu que nun nos dexa descansar nin un minutu. Suponse que tenemos que tar coneutaos cada micra de segundu a un mundiu artificial que se publicita como la mayor de les modernidaes y que, por embargu, ye dafechu la esclavitú del consumidor.

Llectora o llector, tentemos romper les cadenes, meditemos ensin ruíu, llogremos nun avergoñanos de tar solos, de nun falar, d’escuchase hasta’l circular del sangre, echase y zarrar los güeyos pa viaxar a la tranquilidá, a la verdá, que nun ye otra que la que tu pienses y ellos nun t’ordenen.

Y que nun t’engañen, la revolución de la soledá y del sele silenciu tien de ser voluntario, cuando tu quies, non cuando ellos te lo imponen.

Suscríbete para seguir leyendo