El güertu del Santu Domingu espoxiga cola collecha

El güertu escolar del colexu Santu Domingu de Guzmán FESD d’Uviéu yá recoyó la primer collecha y tien destín pa la recaudación. Los alredor de 200 euros que se llograron cola venta de les hortolices y plantes arumoses nel mercadín entamáu apocayá van van dir pal proyectu que punxo en marcha’l centru a lo llargo d’esti cursu. "Vamos invertilo na adquisición de semiente", aseguró la directora del colexu, Sara Bárcena.

Nel güertu, llamáu Suaños de semiente, "participa tol colexu", indicó Fátima Alicia Martínez, coordinadora del güertu y profesora d'Infantil. "Ye un proyectu interdisciplinar, nel que los alumnos de los cursos cimeros, el Bachilleratu, van enseñando a los pequeños", aseguró la docente. Les families vienen velo y va haber visites de los güelos pa enseña-yos a los estudiantes cómo se cuida un güertu.

Pa la so puesta en marcha utilizáronse los 300 euros apurríos pola Ampa (Asociación de Madres y Padres), que collaboró col colexu Santu Domingu de Guzmán (Dominicos). Esta iniciativa axunta amás, señaló la directora del centru, "la implicación del profesoráu, xenerando nuevos recursos formativos, xunto cola collaboración del alumnáu de distintes etapes educatives".

Los alumnos "aprienden enforma" con esti proyectu, comentó Bárcena. Ven cómo espoxiguen munches plantes y los cuidaos que-yos faen falta. "Plantamos y regamos", afirma Llara Miranda, de 5 años, que xunto a los sos compañeros de clas José García, Alejandro Suardíaz, Diego Betancourt, Isabel Díaz y Lucía Gancedo, encárgense del güertu los últimos díes. "Tenemos llechugues y freses", esplicaron los escolares, que destaquen que nos güertos "hai que poner espantayos".

Nel güertu, que va poco camudó d'allugamientu dende una terraza interior hasta un espaciu esterior na zona más próxima al parque del Campillín xunto a una zona de descansu, asitiáronse cartelos pa que los alumnos sepan de qué planta se trata. Nos bancales hai cenahories, espinaques, ayos puerros o coliflores pero tamién cilantru, wasabi, menta, lavanda, perexil o menta chocolate. Nel suministru collabora tola comunidá educativa.

"Equí ye too ecolóxico", resaltó Fátima Alicia Martínez. Les docentes rescamplen que "cuando surde un problema ye cuando los estudiantes aprienden más" yá qu’hai que busca-y una solución. Amás, realízase un trabayu complementariu en clase, con temes como’l biltu de la semiente.

Por aciu del cultivu de toa esta variedá d'hortolices y plantes arumoses, l'alumnáu, señaló la directora del centru, "ta entendiendo’l verdaderu valor de l'agricultura ecolóxica al par que se pon al día sobre los ciclos de semar y collechar pa tratar d'entender la importancia del consumu de productos de temporada". Esta iniciativa, amestó Sara Bárcena, "ta teniendo gran acoyida y la intención ye siguir ampliando tanto la variedá de les plantes como’l númberu d'actividaes rellacionaes coles mesmes".

Esti proyectu impulsáu nel colexu Santu Domingu de Guzmán enmárcase dientro del fomentu de la cultura ecolóxica y los Oxetivos de Desarrollu Sostenible.