Coqueteo digital

–¿Pa qué mirasti?

–Cabrón.

–¿Quién te mandó mirar?

–Qué morro tienes.

–«La curiosidá mató al gatu».

–¿Quién ye?

–Nun tien importancia, Nuri.

–Qué poca vergüenza. Pero, vamos ver, tu…

–Nun soi yo, ye’l WhatsApp.

–¿Que qué, ho?

–Ye un simple coqueteo dixital.

–Pero...

–La culpa tiénesla tu. ¿Quién te manda andar rabilando?

–Cínicu, embusteru, infiel…

–¡Hala, qué esaxerada yes!

–¿Qué pienses, que nun sé lleer?

–Son pijadas, muyer.

–«Hayer punxístime cachondu!». Y enriba, con faltes d’ortografía.

–¿Qué, ho?

–Ayer nun lleva hache, ¡oveya!

–¿Y hoy?

–Hoy sí.

–Jobar, como cambien les coses d’un día pa otru.

–¿Y esto? «El cuerpu pídeme salsa». Nin que fueras un spaghetti, Celes. Flipo.

–Pues anda que yo…

–¿Que qué, ho?

–Que nun sé qué faes tu mirando’l mio WhatsApp.

–¡Ja! Agora va ser culpa mio, ¿non?

–Pos sí. Tas violando la mio privacidá. Nun ye legal. Que lo sepas.

–Tu sí qué nun yes legal. Claro, por eso andabes a lo foíno, guasapeando a escondíes…

–Qué fácil ye sacar les coses de contestu.

–¿Quién ye esta rapaza, Celestino?

–Nun sé.

–¿Cómo que nun sabes?

–Non, nun lo sé. Entrome por WhatsApp.

–¿Y por qué te entró?

–Qué sé yo. Igual ye un robot. Anque pa ser un robot ta bien buena.

–Yes más cínicu qu’un políticu en campaña.

–Son pijadas, Nuri.

–Sí, ho. Una infidelidá en toa regla. ¿O vas dicime que non?

–Non. O sí, qué sé yo. Pero la infidelidá por WhatsApp ye inofensiva.

–Qué morro tienes y qué mal escribes. Ye que, mira, nun sabes nin falar.

–Pos anda que tu…

–¿Yo qué?

–Nuri, fales como una ciudá de los Estados Unidos.

–¿Los Ángeles?

–Non, Kansas. Kansas, Nuri. Tiénesme agotáu, vida.

–Qué triste, poneme los cuernos con un bot d’Asia.

–Nun soi yo, Nuri, ye’l WhatsApp.

–¿Y tu por qué te declaraste? ¿Por qué-y siguisti’l xuegu?

–Coqueteo y tal… Coqueteo dixital.

www.parandoenvillalpando.com