Pasó l'iviernu y cuasique nun abrimos el paragües. Toos naguábemos porque lloviera un poco, y ye que a los asturianos fainos falta la humedá. Por fin, yá metíos na primavera, la lluvia nes sos variaes formes, fixo actu de presencia nel nuesu entornu. Cuando hai una temporada de seca, ye cuando se nos bien a la mente lo que pue pasar si l'anunciáu ya inminente cambiu climáticu que nos amaga fai los estragos de los que nos alvierten los científicos. Una de les más clares consecuencies que pue traer consigo ye la escasez d'agua nel planeta, que yá güei ye un problema pa munchos millones de persones nel mundu.

L'agua ye necesario pa vivir y nun nos damos cuenta de que si toos zarráramos de xemes en cuando'l grifu, podríen aforrase munchos llitros al día. Na sociedá occidental disponemos nel llar de tou tipu d'electrodomésticos, llavadores, y fregaplatos, duches, columnes d'hidromasax y demás artiluxos. Munchos mui útiles pal trabayu diariu y pa facer la vida más fácil y otros que más bien podríemos, dacuando, prescindir d'ellos. Güei cuasique desgastamos el pelleyu de tanto llavanos. Pero resulta que vamos tener qu'apretar el cinturón, como se suel dicir; tomar midíes drástiques no que cinca a tanto espilfarru d'agua, un bien natural qu'hasta fai unes décades naide s'ocupaba de que podía escasiar y menos n'Asturies tanto pola lluvia abondante nel país, como pol númberu de fontes, ríos, regatos, pozos y poces.

N'époques si se quier non mui llonxanes, la especie humana acomodó la so esistencia a l'agua disponible nel llugar. Por un llau, los pueblos asentáronse en llugares onde había agua abondante y de bona calidá, cerca los ríos y fontes pa poder satisfacer les sos necesidaes de consumu y llimpieza, anque nun fuera cola facilidá que güei la consiguimos. Antañu había qu'acarretala en calderos y hasta les últimes décades del sieglu XX, munches muyeres diben llavar al ríu, dalgo qu'inda se vien faciendo nos países subdesarrollaos. D'otra miente, los aprovechamientos agrarios y los estilos de vida fixéronse a les cantidaes d'agua de los distintos llugares. Pero güei la civilización industrial multiplicó la población nes ciudaes y frayó dafechu'l tradicional afayamientu de la xente a esta disponibilidá, dando llugar a una sensación d'escasez y una presión sobre l'agua ensin precedentes. Agua pa la industria, preses hidráuliques, riegu artificial, electrodomésticos, etcétera. Agua pal usu lúdicu y pa folgar; fontes qu'adornen les ciudaes, parques, estanques artificiales, piscines públiques y privaes, cases de baños y demás. Y mientres tanto, hai munchos llugares nel mundu nos qu'inda nun disponen d'agua potable, un problema qu'afeuta a la calidá de vida y a la salú de les persones que lo sufren. Mientres nosotros la esperdiciamos y gastamos ensin tasa, son munchos miles de neños de países subdesarrollaos los que muerren tolos díes por enfermedaes que tienen que ver cola falta d'agua potable.

L'abastecimientu d'agua depende, cada vez más, de les grandes traíes, que ficieron del agua un bien económicu que pagamos, disfrutamos y esperdiciamos y del que fan bon agostu los negocios rellacionaos cola mesma. La sobreesplotación y la contaminación son la causa de que se pierdan munchos y munchos llitros. Munches fontes tradicionales que yeren utilizaes dende fai munchos años, güei tan seques, descuidaes o contaminaes. El calce de los ríos baña montoneres de basura y elementos contaminantes, y, n'ocasiones, grandes vertíos industriales afeuten a la flora y a la fauna de los mesmos.

Fai falta una bona concienciación de la población y una riestra de midíes a tomar por parte del Gobiernu y d'instituciones públiques y privaes; educar nel consumu responsable del agua nel llar, nos llugares de diversión, na industria, n'agricultura y nel campu. Fai falta que toos sepamos lo que supón pa la humanidá la contaminación fluvial, marítima y ambiental, p'asina poder asumir caún la responsabilidá que-y toca. Poner cotu a la escasez d'agua debiera ser un oxetivu de toos.