El cotu de pesca ensin muerte de Mieres, inauguráu en 1997, llegó a tar consideráu por delles revistes especializaes el meyor d'Europa dientro de la so categoría. Foi un curtiu tiempu de gloria, visto que'l declive empezó yá a principios del nuevu sieglu. Los pescadores sostienen que l'apaición desenfrenada de mabees esquilmó'l calce de truches. Depués llegaríen les garces, acentuando'l problema. Agora, un nuevu enemigu “afrella” a la debilitada población de truches. Nesti casu trátase d'otru pez que compite pol mesmu hábitat. Ye la boga de ríu. 

“Dende va un tiempu'l calce ta llaráu de bogues y naide sabe d'aú salieron”, apunta Ignacio Fernández Cerra, responsable comarcal de l'Asturiana de Pesca. El problema que xenera la boga ye que, más allá de que pueda comer delles güeves de trucha, compite a la hora ganar espacios nel hábitat. Xenera, poro, una nueva torga pa la crecedera de la población de trucha: “Tamos otra vuelta delantre d'una cuestión que dellos ecoloxistes prefieren resalvar. Les especies autóctones tán viéndose desplazaes por otres foriates”, remarquen los pescadores. 

Delles investigaciones recalcaron que los pexes introducíos “compiten pol espaciu y l'alimentu, depreden o hibriden colos autóctonos, introducen parásitos y enfermedaes, alterien los procesos ecolóxicos y amenorguen la calidá ambiental”. De resultes de les múltiples introducciones que se llevaron a cabu n'España, les comunidaes de pexes viéronse mui alteriaes pola llegada, por casu, d'especies exótiques, que pasaron a ser dominantes en númberu y biomasa nos tramos medios de diverses cuenques peninsulares. Espertos como Benigno Elvira, investigador del departamentu de Zooloxía y Antropoloxía Física de la UCM, reclaquen que, la hibridación ente especies xenéticamente próximes puede producise cuando, por exemplu, por causes non naturales (introducciones o treslocaciones) viven y se reproducen nes mesmes árees. 

La presencia de la boga de ríu na comarca del Caudal ye totalmente nueva. “Trátase d'una especie mui común, por casu, nel pantanu de Barrios de L.lena”, espliquen los responsables de l'Asturiana de Pesca. La entruga que se faen ye cómo estos pexes llograron colonizar tan rápido'l territoriu: “Un ave ye obvio que llega volando, pero un pexe tienlo más difícil pa movese. Nun tienen nales nin pates”. Los pescadores, nun lo dicen abiertamente, pero abarrunten que detrás de la espansión de la boga tien que tar necesariamente la mano del home: “Llegaron a dicinos que nel so momentu pudieron aportar a la zona güeves, por exemplu, apegaes a les pates de dalguna ave, pero suénanos un poco fantasmero”. 

Lo que rescampla ye que la trucha viose emburriada a compartir el so hábitat natural con una nueva especie que paez afayase meyor: “Ente mabees, garces y especies alóctones tamos estropiando la nuesa población de truches”, sorrayen los pescadores. 

Demanda de reserves

El desplazamientu de la trucha nel ríu Caudal tien bien esmolecíos a los pescadores dende fai yá más d'una década. Y ye que'l cotu “ensin muerte” de Mieres anguaño esmuz ensin casi demanda y con una colonia de truches arruinada, primeramente, por una “descontrolada” presencia de mabees. La resultancia ye que de les 530 reserves abiertes pa los pasaos meses de xunetu y agostu, namás se cubrieron un puñáu. Pocos agoraren un desenllaz tan mustiu pa un proyectu tan brengosu nel so orixe. La boga de ríu nun gusta a los aficionaos: “Ye abondo más pequena que la trucha y tienen munches espines”.