El Muséu de la Sidra quier ser mundial y convertise nel principal referente de la so promoción esterior

Asturies lleva camín de convertise na indiscutible capital mundial de la sidra de la mano de la Unesco y el muséu sobre la tradicional bébora inauguráu en Nava fai xusto agora un cuartu de sieglu nun quier quedar atrás. Depués de pasar años sumíu nuna crisis tan seria que, inclusive, corrió seriu riesgu de trancar, l'equipamientu empieza agora un ambiciosu plan de relanzamientu col que, amás d'incrementar el númberu de visitantes, pretende afitase como un espaciu d'alcuentru pa tol sector y nel referente principal pa la proyección de la sidra asturiano nel esterior, xusto cuando la so milenaria cultura ta a piques de ser declarada Patrimoniu Cultural Inmaterial de la Humanidá.

Gobernáu por una fundación en que'l so patronatu figuren los conceyos de la Comarca de la Sidra, Xixón y Siero, el Principáu, la Caxa Rural, l'Asociación de la Sidra Asturiano y la patronal turística Otea, el muséu vien marcando dende va tiempu un claru enclín a la baxa nel númberu de visitantes. Pasó de los más de 40.000 de 2007 hasta un mínimu de 13.000 en 2018. La situación ameyoró en 2019, con 17.000 usuarios nel que foi l'últimu añu de funcionamientu normal del equipamientu, que, magar les dificultaes, cerró esti añu'l meyor mes d'agostu de la so hestoria, con un total de 3.262 visitantes. Nesti ámbitu, les actuaciones incluyíes nel plan de reactivación, al que tuvo accesu LA NUEVA ESPAÑA y que les sos llínees xenerales recuéyense nel cuadru qu'acompaña esta información, márquense como oxetivu una medría del públicu del venti per cientu nun solu añu. La inversión prevista, a falta d'axustes, sería de 872.215 euros en cuatro exercicios.

El remocique de la esposición, con un costu de 58.000 euros, ye ún de los aspeutos fundamentales pal futuru inmediatu del muséu. Y ye que la mayor parte de los sos elementos y dispositivos son esactamente los mesmos desque fai 25 años l'entós Príncipe d'Asturies inaugurara la instalación. Foi'l mesmu día –9 de payares de 1996– qu'apurrió'l premiu Pueblu Exemplar d'Asturies a la comunidá vecinal de Nava pola defensa de la sidra y del so ricu patrimoniu. La previsión ye qu'esta urxente actualización s'afite en conteníos sensoriales, interactivos y dixitales, incluyendo sistemes de realidá virtual y aumentada. P'animar a repitir la visita, tamién s'entamen cates, eventos gastronómicos y hasta “escape rooms”.

Otra clave del plan pal muséu pasa per estrechar les sos relaciones con tolos estamentos del sector y la so proyección internacional, ampliando'l patronatu de la fundación cola entrada de más organismos y contando con empreses privaes. Ente los retos pendientes tamién figura incrementar el númberu de visitantes foranos, qu'agora apenes llega al 4 por cientu, y que podría multiplicase si, como paez claro, la cultura sidrera ye designada Patrimoniu Inmaterial de la Humanidá.