Los mupis de Mieres enllénense de poesía con poemes de Teodoro Cuesta y de Lourdes Álvarez

Los mupis de Mieres enllenáronse de poesía n'asturianu al traviés d'una iniciativa entamada pol Conceyu de Mieres al traviés de la Conceyalía de Normalización Llingüística. Asina, nestos díes, estos soportes promocionen la lliteratura n'asturianu con trés poemes que puen lleese nes cais del cascu urbanu.

Trátase de '¡Bon páxaru!', de Teodoro Cuesta, y 'Depués de suañar mares' y 'Tierra de nome', de Lourdes Álvarez, poeta mierense ganadora dos veces del Teodoro Cuesta de Poesía y última gallardonada col Premiu Nacional de Lliteratura Asturiana.

Con esta idea, el Conceyu saca les lletres y la poesía n'asturianu a la cai coincidiendo amás cola Selmana de les Lletres Asturianes. Una cita a la que'l Consistoriu sumóse entamando delles actividaes, ente les que destaca la entrega del Premiu Teodoro Cuesta de Poesía a Gonzalo González Barreñada, con un posterior alcuentru pa presentar el so poemariu 'Cartes al treslluz'.