De Guatemala a Villaviciosa detrás de los pasos de Santa Clara: la pasión relixosa de Jessica Lima

A los sos 26 años, Jessica Lima fala con pasión de la vocación que la llevó a travesar l'Atlánticu, superando tolos sos mieos, pa entamar una nueva vida nel monesteriu de les Clarises de Villaviciosa. La rapaza guatemalteca llegó va un mes a la congregación maliayesa onde, a poco y a poco, empezó a afayase a un día a día dedicáu al Señor.

Empezó too con un retiru. "Duró trés díes, pero tuvieron enllenos d'allegría. Les palabres del padre Raúl Ruano llegáronme y empecé a querer saber más de les relixoses. Falé col obispu d'ellí, que me punxo en contactu con Sor Toti y foi ella la que m'enseñó muncho d'esta vida. Falóme de Santa Clara y yo pensé: quiero ser cómo ella. Sentíme mui identificada", esplica la moza guatemalteca.

Empezó entós la busca de la congregación perfecta pa la rapaza. "Nel mio país hai dos congregaciones dedicaes a Santa Clara, pero hai munches vocaciones y nun teníen sitiu pa mi, y a les carmelites nun quería axuntame", afirma. El destín quixo que Lima tuviera presente una de les vegaes que l'abadesa de Villaviciosa, María Luisa Picado , llamó a Sor Toti. Escuchó la conversación, qu'en Villaviciosa faltaben vocaciones ya ilusionóse enforma. Sicasí, les inseguridaes y el mieu apoderáronla nesi primer momentu. "Quixo dame'l so teléfonu, pero díxi-y que non. A los díes, volvió llamar cuando yo taba presente y ehí decidíme", remembra. "La vida que tenía yá nun m'enllenaba, quería daqué más íntimo col Señor", apunta.

La moza entamó una relación cola abadesa de Villaviciosa, mesmo por mensaxes como por conversación telefónica, na que dambes se fueron conociendo, intercambiando opiniones y pensamientos. Ye lo que se denomina, según esplica Picado, "el aspirantáu". "Ye un añu d'esperiencia que puede ser presencial o nes sos cases, anque lo normal ye qu'entren y salgan del conventu. Dempués d'eso vien el postulantáu, que dura otru añu, y, depués, el noviciáu", fae l'abadesa.

Paralelamente a esti procesu, Lima entamó tamién los trámites pa poder treslladase a España. "Primero fai falta una carta del so obispu, que yo faigo llegar equí al Arzobispu. Si la acepten, yá puede venir", indica l'abadesa. El 11 d'agostu llegó-y l'aceptación y el 12 d'avientu, coincidiendo cola festividá de la Virxe de Guadalupe, el so visáu. "Nun contara con que llegara tan llueu, nunca lo voi a escaecer", reconoz la rapaza. Apenes dos selmanes dempués, aterrizó n'Asturies. "Siéntome mui a gusto equí, toi mui feliz", asegura. Ye un sentimientu que comparten les hermanes maliayeses. "Ta integrándose perbién. Esti día acompañóme a Uviéu y vamos tener que llevala a Cuadonga por que pueda conocer ónde ta", anuncia Picado con una sorrisa.