El Belles Artes entama un nuevu montaxe de les sos obres nel Palaciu de Velarde

Faciendo de la necesidá virtú, el Muséu de Belles Artes d'Asturies entamó una interesante reordenación y montaxe de los sos fondos d'arte español de finales del sieglu XIX y principios del XX, con mayor llucimientu inclusive pa dalgunes d'elles. Dende esti día, nel patiu del Palaciu de Velarde espónense reaxuntaes obres d'autores que siguen una llinia temporal y, amás, dedicóse una sala completa a esponer una parte destacada de los fondos qu'atesora del pintor valencianu Joaquín Sorolla. 

Esi movimientu de pieces tien que ver cola preparación de la llegada de la gran esposición dedicada a Luis Fernández –que'l Muséu de Belles Artes d'Asturies entamó en collaboración cola Fundación María Cristina Masaveu Peterson y que va ocupar dafechu les plantes 0 y -1 del Edificiu Ampliación–. Asina que les obres d'arte español creaes ente finales del sieglu XIX y principios del XX, con nomes destacaos, atoparon acomodu en Velarde. En concretu, nel patiu enséñense les espresiones pictóriques del realismu adscrites a un grupu d'artistes nacíos ente les décades de 1840 y 1870 y qu'actuaron como antecedentes de la modernidá. Obres, munches de gran formatu, de Dionisio Baixeras, Salvador Sánchez Barbudo ya Ignacio Díaz Olano, mesmo qu'otres menos enseñaes feches por Salvador Viniegra, Eduardo Chicharro y José Villegas. Na sala A muéstrense, per un llau, una selección de creaciones postimpresionistes obra de Darío de Regoyos, Zuloaga, Romero de Torres ya Iturrino, mentanto que, pel otru, el visitante va atopar auténtiques obres maestres del modernismu catalán con representaciones de Ramón Casas y Hermen Anglada-Camarasa, lo mesmo que d'otros del calibre d'Isidre Nonell y Joaquim Mir. Na sala B reasitiáronse los Sorolla. 

El conxuntu escoyíu va poder contemplase nel so nuevu allugamientu hasta empiezos del mes de xunu.