L'alternativa que plantega agora'l Principáu pa qu'Arcelor execute la so inversión de más de 1.000 millones

Les duldes sobre'l preciu del hidróxenu verde ye ún de los factores que tán provocando qu'ArcelorMittal nun se decida a completar la inversión de 1.000 millones d'euros pa decarbonizar la cabecera siderúrxica de Xixón con una planta de reducción directa de mineral de fierro (DRI). Gobiernos y multinacional siderúrxica axusten alternatives y esti día la conseyera de Transición Ecolóxica del Principáu, Nieves Roqueñí, rescampló que nel proyectu del DRI yá se contempla un periodu inicial de transición usando como reductor del mineral gas natural y non hidróxenu. "Esi gas natural puede dir reverdexando", señaló Roqueñí apuntando la posibilidá d'entemecer el gas natural con biogás o biometanu llográu a partir de residuos p'amenorgar les emisiones.

Roqueñí fixo esa afirmación na Xunta Xeneral del Principáu en respuesta a una entruga del diputáu de Foro Asturies Adrián Pumares na que rescampló que "fadría falta y sería perimportante dexar a ArcelorMittal afitar el so plan de descarbonización nel gas", visto que l'hidróxenu ye una tecnoloxía "inmadura" y qu'esa otra opción dexaría amás "aprovechar la regasificadora d'El Musel". 

Roqueñí respondió que "ye verdá qu'el mesmu proyectu del DRI d'Arcelor yá contempla una transición utilizando gas natural primero de tener l'hidróxenu verde disponible y que, poro, el gas ye un vector de transición más allá de la declaración que fixo la UE na so taxonomía". Sicasí, Roqueñí non solo ve'l gas natural como una opción a curtiu plazu. "Ye perimportante qu'esi gas vaiga reverdexando y nesi sentíu ta empezando a haber munchos proyectos de biogás y biometanu basaos en residuos que permiten tamién que l'usu del gas como vector en procesos como la siderurxa tean llibres d'emisiones de CO2", amestó.