Esti ye'l pueblu asturianu que quier atraer a nómades dixitales (y el so plan pa facelo)

Ayer quier apostar pola anovación y polos proyectos que puedan atraer población al conceyu. Una de les sos postreres apuestes ye la de tresformar l'antiguu colexu de Santibanes de la Fuente nun centru residencial y de trabayu pa nómades dixitales. El consistoriu va presentar la iniciativa a la llinia d'ayudes d'hasta 1 millón d'euros del Institutu pa la Transción Xusta, esperando que sía aprobáu pa entamar les obres.

L'alcalde, Juan Carlos Iglesias, señaló que "la nuesa idea ye la de recuperar edificios y ufiertar alternatives habitacionales y d'empléu, nesti casu, dirixida a nómades dixitales, o lo que ye lo mesmo, persones que puedan teletrabayar y que quieran facelo nuna zona rural como ye Santibanes". Amás, destacó'l rexidor, "la próxima instalación del centru de Supercomputación nel pozu Santiago, que tendrá n'Ayer la gran nube asturiana, va ser un atractivu mayor pa los trabayadores d'esti sector".

El proyectu ye ambiciosu, non solo pola inversión, sinón tamién poles obres que quieren realizase y el tipu de complexu que se diseñó. Esplica'l rexidor que pal área de trabayu diseñóse un espaciu de 110 metros cuadraos. El proyectu contempla la instalación de trés cabines indiviudales pa realizar xuntes o videollamaes de forma privada, una sala de xuntes de 27 metros cuadraos, una zona de recepción, y tolos servicios que puedan facé-yos falta a los interesaos, como un salón-cocina común. Amás, el documentu que se va presentar a la subvención cuenta, na parte residencial o de "coliving" la construcción d'una docena de viviendes, en formatu estudiu, de 30 metros cuadraos. Tendríen bañu, cocina y salón, la zona d'habitación, amás d'una pequena terraza de cinco metros cuadraos.

Per otra parte, na planta baxa cuéntase qu'haya una sala multiusos de 90 metros cuadraos, unos aseos, y una zona d'almacenaxe, amás de vestuarios y una sauna, mesmo qu'un espaciu esterior d'esparcimientu. Dientro del antiguu colexu, quedaría una zona zarrada, pero yá preparada pa la instalación d'otres seis viviendes nel casu de que fixera falta.

"Ye un proyectu nel que llevamos tiempu trabayando y que creemos que puede ser bien interesante p'atraer población a esta zona", manifestó'l rexidor, Juan Carlos Iglesias. "Una de les coses que dexó la pandemia ye que muncha xente que puede teletrabayar tomó la decisión de treslladase a zones rurales, fuxendo de les grandes masificaciones", lo qu'agora se conocen como nómades dixitales. "Creemos que col espaciu que se va a habilitar en Santibanes de la Fuente ufiertamos una gran alternativa pa estos trabayadores", amestó Iglesias, que punxo en valor, otra vuelta, la cercanía col centru de Supercomputación del pozu.