Alfredo Medina amuesa les sos semeyes de "Nalonia", sobre l'Asturies postindustrial

Alfredo Medina ye un fotógrafu avilesín y espón dende va unos díes nel Centru de Servicios Universitarios de la cai La Ferrería. Presenta la so esposición "Nalonia: más allá del paraísu" qu'al traviés de fotografíes enseña l'Asturies postindustrial, una estampa "alloñada de la imaxe turística". Pa ello, fixo una selección d'obres dende'l conceyu de Llaviana hasta Muros de Nalón y enseña, ente otres, la cadarma d'un barcu na folla de L'Arena (Sotu'l Barcu) y la imaxe d'un caballu delantre de la térmica de Lada, en Llangréu. Tamién prinda imaxes de Los Barreros, Sotrondio y otros enclaves d'esa Asturies "qu'enantes yera una sociedá de bayura no económico y que foi a menos y cuenta con barrios ermos...". L'autor garró como referencia el calce del ríu Nalón pa esplicar la degradación de les redolaes naturales, les aglomeraciones urbanes o los efectos de la crisis, según palabres de Medina, que tien como principal oxetivu "facer cavilgar" a les persones que s'averen a la esposición. 

La muestra, que va poder visitase hasta'l próximu 17 de mayu, inclúi la proyección d'un vídeu con toles imaxes del proyectu, unes sesenta. "Nalonia: más allá del paraísu" pretende ser una reflexón sobre la decadencia y el porvenir d'unes comarques que son tamién parte d'un ‘Paraísu Natural’", indicó pa dempués detallar que la intensa actividá minera ya industrial de la rexón a lo llargo de décades "provocó fondes feríes nel paisaxe y xeneró un microcosmos mui singular". "Nalonia" ye un proyectu "al llargu plazu" y tien vida propia como'l territoriu qu'amuesa, que ta lloñe de ser un ente alministrativu real pero sí caltien una identidá riberana común. 

"Nalonia" ye, coles mesmes, un exemplu qu'Alfredo Medina utilizó pa impartir una charra qu'acompañó a la inauguración de les sos fotografíes. La conferencia titulóse "Fotoensayu: una ferramienta pa entender el territoriu", que ye precisamente lo que consiguió crear cola so cámara. 

El fotógrafu avilesín detalló na so intervención dellos conceutos como el de "fotoensayu", estremáu del fotoperiodismu, y que busca "un analís más tranquilu, reposáu y meditáu" dientro del ampliu campu de la fotografía documental, esto ye, un analís de la realidá sol prisma suxetivu del autor.