Asturies menguó en 2023 el pesu de la deuda pública al mínimu nuna década

Asturies fue quien a menguar en 2023 el porcentaxe de la so deuda pública al respeutive del PIB rexonal en más d'un puntu porcentual en comparaza col añu anterior, pasando del 16,3% col que cerrara 2022 al 15,1% rexistráu a la fin del últimu exerciciu, según el balance presentáu va unos díes pol Bancu d'España. Ello ye la ratio más baxa dende'l 14,7% llográu en 2013, una década primero. En términos absolutos, eso sí, el volume d'endeudamientu públicu del Principáu creció llixeramente l'añu pasáu: de los 4.217 millones d'euros rexistraos a finales de 2022 a los 4.243 millones. 

Esta foi la tónica xeneral nel conxuntu de les alministraciones públiques españoles en 2023, que la so deuda total cifróse en 1,574 billones d'euros, lo que supon una medría del 4,7% al respeutive del añu anterior. Sicasí, el montante equivalió al 107,7% del PIB nacional, cuasi cuatro puntos menos que la tasa rexistrada a finales de 2022 (111,6%). 

L'amenorgamientu d'esta ratio de deuda sobre'l PIB meyora, amás, en cuatro décimes la prevista nel Plan Presupuestariu, onde'l Gobiernu albidró qu'asitiaría nel 108,1% del PIB pal conxuntu del 2023. 

Les estimaciones del Executivu apunten a que la sienda descendente de la deuda pública va siguir los próximos años, yá que cuenta con que baxe del 106,3% en 2024, al 105,4% en 2025 y al 104,4% en 2026. 

Dientro de les comunidaes autónomes, los pasivos crecieron en términos absolutos en toles rexones sacante nel País Vascu, Cantabria y Baleares. Cataluña (85.986 millones d'euros), Comunidá Valenciana (57.993 millones), Andalucía (38.649) y Madrid (35.875) siguieron concentrando nel añu 2023 dos tercios de tola deuda en manes de los gobiernos autonómicos, anque ello tamién se debe a una cuestión de población. 

Pero, mesmo qu'Asturies, toles comunidaes amenorgaron los sos porcentaxes d'endeudamientu, sobremanera Baleares (en 2,7 puntos de PIB), Cantabria (2,1 puntos), Cataluña (2,1 puntos) y Navarra (2 puntos).