Toi por asegurar que'l pasáu día 21, el Sol y la Lluna anduvieron a la tema. El sol allumó quince hores y la Lluna presumiendo de lluz, anque seya prestada, presumiendo de la so cara redonda y brillante, allumó la nueche máxica con tol esplendor. Ello porque'l solsticiu de branu coincidió esti añu cola lluna enllena. Pa munchos de nosotros, esta foi la única oportunidá na nuesa vida pa ver esti acontecimientu astronómicu. Dalgo que nun se repetirá hasta 2062, y munchos yá nun taremos equí pa presencialu, como nun seya que'l más allá tea cerquina de dalgún d'esos astros. ¡Quién sabe! Naide volvió pa contalo. Naide. Por munches pantasmes que dicen que por veces vienen a visitanos, enxamás nos dixeron ónde tienen el so espaciu. Eso sí, pantasmes atopamos a cada pasu. Anque paeza una paradoxa, tamién hai pantasmes de carne y güesu que viven ente nós.
Por eso, l'otru día, aproveché pa recreame y mirar les estrelles y la lluna enllena, qu'allumaba la nueche más curtia del añu. Nun sé si con esta coincidencia se-y potenciaríen tolos poderes qu'exerce sobre la Tierra y los seres que la habitamos.
Agora con tantos llobos qu'anden sueltos y faciendo estragos, de xuru qu'esta nueche máxica s'oyeríen los sos aullíos suplicándo-y a la lluna que-yos devuelva la solombra. Y de xuru, qu'otros llobos que tamién aullen estos díes a too aullar-y suplicaríen a la lluna que-yos dea poder y más poder pa mandar y mandar y controlar esti mundu somorguiáu nes solombres y na escuridá.
Contemplé'l fueu la nueche San Xuán, el fueu que restallaba fuerte con tantos deseos como-y echaron los presentes. Fueu atizao cola esperanza y la ilusión qu'enxamás se pue perder. Fueu atizao con deseos ya sueños, sobre too, col gran deséu de que reine la cordura, dalgo de lo que tamos tan faltos. Xanes, trasgos, y otros seres máxicos danzaron con nós esta nueche maraviosa y tresmitiéronnos una vez más les ganes de suañar.
Cuántes veces nagüé por ser xana. Ser xana por un tiempu pa disfrutar a tope la maxa de la vida.
