La sala uvieína Alfara enseña lo meyor del grabáu mozu español

La galería Alfara (na cai Mateo Llana de La Florida, n'Uviéu) acueye hasta'l próximu 17 de mayu una amplia amuesa de los meyores grabadores mozos españoles. Son les obres de doce artistes que surden del proyectu de collaboración que, dende 2011, desenvuelve esta galería uvieína col CIEC, el Centru Internacional de la Estampa Contemporanea, en Betanzos (A Coruña), una institución de referencia nacional na formación de nuevos ceadores gráficos.

Dende 2011, los talleres d'Alfara en Salamanca acueyen a lo llargo de quince díes a doce artistes propuestos por dambes instituciones. Toos comparten esperiencies artístiques y vitales en medio del campu charru col envís de producir obra nuevo. La técnica, el tema y la edición son llibres, l'únicu condicionante ye'l tamañu que tien de ser de 50 x 70 “pa facilitar la coherencia de les posteriores esposiciones colectives” que s'entamen al tiempu en Betanzos, nes instalaciones del CIEC y n'Uviéu, na Sala Alfara.

Nesta magnífica esposición colectiva qu'agora se puede contemplar n'Alfara inclúinse non yá les obres de los artistes participantes de la última edición del so proyectu en collaboración col CIEC, l'amuesa tamién se completa con una retrospectiva de los alcuentros d'años anteriores. Y asina enséñense un total de 23 obres d'otros tantos artistes. Los autores son Sara Cuesta, Andrea Navarro, Miguel Feo, Marilisa Lino, Valentina Mejía, Rita García, Eduardo Pumariega, Guillem Herrera, Caterina de Nisco, Ana Bustelo, Alejandro M. Sanz Guillén, María Castillejo, Daniel Muiños, Tina Araüna, Aida Valdés, Marina Suárez, Ana Crujeiras, Lucía Castro, Federica Bau, Miguel Naire, Pablo Naire, Desirée Moreno y Irati Retolaza.