¿Afecten les carreteres a la distribución espacial de los osos? La tesis “Nuevos aspectos del comportamiento y de la ecología del oso pardo en ambientes humanizados” que firma Enrique González Bernardo conclúi qu'esti tipu d'infraestructures “nun modifiquen sustancialmente l'hábitat d'estos animales”. L'estudiu, que dirixeron Vicenzo Penteriani y María del Mar Delgado dientro del programa de doctoráu en Bioxeociencies de la Universidá d'Uviéu, tamién analiza otres cuestiones rellacionaes colos plantígrados como la envernación o la comunicación interespecífica de la especie utilizando los árboles como si estos fueren un tablón d'anuncios.
González Bernardo empezó la so tesis en xunu de 2018 como investigador predoctoral dientro del actual Institutu Mistu d'Investigación en Biodiversidá (IMIB), con sede nel edificiu d'investigación del campus de Mieres. El so trabayu tuvo amestáu al Grupu d'Investigación del Osu Cantábricu, col qu'inda collabora. En mediu, como apunta, “hubo muncho trabayu de campu”.
P'analizar l'efectu de les carreteres sobre los osos, la investigación basóse en datos d'observaciones de los plantígrados nos postreros venti años. “Atopamos que nenguna variable esplica bien la distancia de los osos a les carreteres y vemos que tán avezaos a la presencia de carreteres o infraestructures de tresporte, por eso consideramos que l'efectu sobre l'hábitat de los osos ye pequeñu”, esplica. A los datos d'observación tamién se sumó un analís de cómo una carretera podría modificar lo amañoso del hábitat del osu pardu. “Estremamos el territoriu por cuadrícules y comprobemos tamién que les actuales carreteres nun modifiquen sustancialmente l'hábitat de los osos, en munchos casos porque tamién traviesen hábitats poco favorables pa estos animales”.
Pero la investigación nun queda equí, la intención de González Bernardo ye llevala más allá de la tesis. “Comparamos el trabayu con otros asemeyaos que se fixeron n'otres partes del mundu y vimos que l'afección de les carreteres nos osos siempre se reporta como menor o inesistente en poblaciones d'Europa, pero n'América del Norte describen efectos muncho mayores, dando a entender que les poblaciones de plantígrados nun s'afayaron tan bien a la presencia de seres humanos”, esplica. Y ye que “la mayor persecución histórica pudo llevar a que les poblaciones europees d'osos s'afayen col so comportamientu o coles sos dietes pa volvese menos problemáticos col ser humanu y causar menos daños a los sos bienes, ye un campu que nos prestaría pescudar agora”.
Comunicación
Otru de los aspeutos de la tesis foi la comunicación interespecífica de la especie. “Lo primero que fiximos foi analizar los sustratos de comunicación nos árboles, visto que siempre lo faen nunos árboles determinaos que funcionen como un nodu d'una rede de comunicaciones”, apunta. Asina, analiza por qué s'escueye un árbol determináu y alcontraron que “los osos escueyen árboles grandes y accesibles, que tean cerca de caminos y con pocos árboles alredor, esto ye, quieren poner el so anunciu nun llugar que seya visible y accesible”.
Y siguiendo con esta investigación sobre la comunicación ente los plantígrados, vieron que nestos árboles había cachos de corteya arrincaos que podíen tener una función distinta. Fixeron un esperimentu. Cubrieron les marques con corteya del mesmu árbol y punxeron una cámara pa ver qué pasaba. Nos vídeos víase al osu que retiraba la corteya de forma automática. “Abultaba como si lu fadiara que tuviera la so marca cubierta, y el fechu de que namás lo fixeren los machos pela época de celu fíxonos pensar que taba rellacionao cola reproducción”, apunta. Ello ye que los osos facíen la marca “tou lo alto que yeren quien, suponemos que pa dar a entender el so tamañu, asina pueden sollertar a otros machos pa evitar la confrontación ente que les femes podíen escoyer al que consideraren como meyor compañeru”.
