Les razones de la baxa competitividá d'Asturies: poca anovación y un entornu económicu desfavorable

La baxa anovación y l'entornu económicu (qu'arrexunta factores como'l dinamismu y el tamañu de mercáu, empléu, PIB por habitante, tasa d'actividá y otros) son el gran llastre de la competitividá asturiana, considerada nun sentíu ampliu, mientres que les infraestructures y el capital humanu constitúin les sos principales fortaleces, según la última edición del informe de la competitividá rexonal nel nuesu país, presentáu esti día pol Conseyu Xeneral d'Economistes d'España. 

El diagnósticu caltien a Asturies como la décima rexón pola so competitividá, mesmo que los últimos exercicios, y polo tanto per debaxo de la octava posición qu'ocupó en 2017. Y asitia al Principáu como la postrera de les comunidaes del Cantábricu. Sicasí, y como aspeutos favorables, Asturies ye una de les 11 rexones españoles qu'en 2021 llograron recuperar el so nivel de competitividá de 2019, previu a la pandemia de 2020. Hai seis comunidaes que nun fueron quien. Y tamién esperimentó una crecedera moderada en tolos parámetros o exes analizaes y leve n'otru, mientres que namás empeoró n'anovación, lo que sigue agravando esti defectu.

De la mesma, el Principáu integra el pelotón de les seis rexones que caltienen un crecimientu mediu-baxu, xusto per detrás de les cabezaleres (Madrid, Navarra, País Vascu y Cataluña), anque Asturies ye la rexón colista d'esi grupu entemediu, con una nota de 7,67 puntos, casi la metá que Madrid (la primera) y 2,5 puntos per delantre d'Estremadura, que ye la colista, anque en 2021 coseñó la mayor recuperación. 

Asturies ye la cuarta rexón española por infraestructures básiques. Trátase un añu más de la so meyor posición nel conxuntu de los parámetros analizaos, lo que discrepa de la percepción convencional de los asturianos. En capital humanu, Asturies ocupa tamién una relevante quinta posición. Baxa al séptimu llugar n'eficiencia empresarial y baxa al undécimu y docenu en mercáu de trabayu y entornu institucional, respectivamente. En toos ellos progresa moderadamente y ocupa un rangu mediu-alto, salvo n'eficiencia empresarial, onde magar ocupa una posición discreta (la séptima), ufierta un perfil mediu-baxu .

El peor comportamientu llévalu nel entornu económicu –nel que namás supera a cuatro rexones, tien una clasificación baxa y amás empeoró en 2021– y, entá lo ye más negativo n'anovación, onde ocupa'l décimu cuartu llugar, magar que tuvo un crecimientu leve pola meyora del esfuerzu priváu nel últimu exerciciu completu . 

L'estudiu conclúi al tiempu qu'Asturies ye una de les rexones con mayor desigualdá (ta nel 96,8% de la media española, pero supera en 20,7 puntos el promediu de la UE) y enseña una dixitalización media. Nesti conceutu ye la sesta comunidá más alloñada de la media española: ta'l 10% per debaxo del promediu . 

La mayor competitividá concéntrase en Madrid y nel cuadrante nordeste, y ye mayor nel norte que nel sur.