El gran almacén eléctricu de Grandas de Salime va ocupar 30.000 metros cuadraos

L'almacén d'eletricidá a gran escala que la compañía cordobesa Rolwind impulsa en Grandas de Salime va ocupar una superficie de más de 30.000 metros cuadraos, nos que se van abellugar un centenar de contenedores de bateríes. L'almacén, que se va allugar nes cercaníes del tramu Grandas de Salime-Pezós del corredor del Navia (AS-12), va tar conectáu cola subestación eléctrica de Pezós por aciu d'una llinia soterraña de casi un kilómetru. El presupuestu de la instalación raspia los 48 millones d'euros. 

El proyectu d'almacén de Rolwind ye'l de mayores dimensiones ente los qu'entamaron la fase de tramitación n'Asturies. Va tener una potencia instalada de 200 megavatios (MW). Según el proyectu presentáu énte'l Ministeriu pa la Transición Ecolóxica, la planta va ocupar una superficie de 30.300 metros cuadraos –l'equivalente a casi cuatro campos de fútbol– del conceyu de Grandas de Salime y va tar formada por 100 contenedores dientro de los cualos va haber seis armarios ("racks") de bateríes de 2.236 quilovatios (kW). La llinia d'evacuación de la planta, de 400 kV, va ser soterraña y va tener un llargor de 980 metros. Va dir dende la subestación d'evacuación, allugada dientro del perímetru de la planta, hasta la subestación eléctrica de tresformamientu de Pezós, propiedá de Rede Eléctrica d'España. 

Dende los gobiernos central y rexonal quier afalase l'entamu d'almacenes d'eletricidá pa sofitar el desarrollu de les anovables. 

La planta de Grandas de Salime va ser un sistema d'almacenamientu a gran escala conectáu directamente a la rede eléctrica y que va operar de forma aisllada. Ye lo que se denomina un sistema "stand alone" en contraposición a los sistemes d'hibridación amestaos a plantes d'anovables. Les bateríes del almacén van cargase con eletricidá de la rede y van descargar nella en función de les necesidaes del sistema y los intereses de la compañía. Amás, la planta va contribuyir al amenorgamientu d'arramaos d'enerxía nuna zona productora, como ye'l suroccidente n'Asturies, nel que toles plantes de xeneración son d'anovables depués del zarru de la térmica de carbón de Sotu la Barca. "L'allugamientu escoyóse pola alta capacidá de recursos anovables que se rexistra na zona", señalaron fontes de Roldwind. 

Les bateríes del almacén van ser de litiu-ferrofostatu (tecnoloxía LFP). "Decidímonos por una tecnoloxía respetuosa col mediu ambiente que tien elementos non contaminantes, como son los ferrofosfatos, y que son más eficientes", apuntaron dende Rolwind, empresa con esperiencia en sistemes d'almacenamientu. 

Al proyectu de Grandas de Salime podríen axuntase otros. "Tamos estudiando dellos allugamientos n'Asturies y nun refugamos el desenvolvimientu d'otres instalaciones", afirmaron fontes de Rolwind. Nel Principáu, otres trés empreses tán tramitando proyectos. EDP pretende convertir la so central térmica de Sotu Ribera nun gran almacén d'enerxía nel que se van aplicar distintes tecnoloxíes; el grupu griegu Mytilineos cuenta invertir 20 millones d'euros nun almacén con bateríes d'iones de litiu en Salas y Grenergy Anovables tramita un almacén de 130 MW de potencia en Mieres.