Les bacteries abonden en Chernóbil y enseñen signos d'adaptación a la radiación, según un estudiu asturianu

Casi 40 años dempués del mayor accidente nuclear de la hestoria –37 pa ser esactos–, les bacteries abonden tanto dientro como fuera de la zona d'esclusión y enseñen dellos signos d'adaptación a la radiación. Asina lo revela una investigación liderada pola Universidá d'Uviéu, qu'acaba de ser publicada na revista «Environmental Pollution». Los científicos, con Germán Orizaola a la cabeza, del departamentu de Bioloxía d'Organismos y Sistemes, atoparon los mesmu valores de diversidá y riqueza de microorganismos nes llamargues muestraes dientro y fuera del área de 30 kilómetros alredor de Chérnóbil. Trátase del trabayu más detalláu sobre les bacteries de la central ucraniana. 

«Dellos estudios esaminaron l'impactu del accidente sobre la naturaleza y los procesos de renaturalización. Sicasí, pocos estudios analizaron la situación de les comunidaes microbianes, magar el so papel principal pa caltener les funciones de los ecosistemes por cuenta de la so implicación na retención y lliberación del carbonu y de los principales nutrientes del suelu», esplica Germán Orizaola. Hasta agora. El trabayu de campu lideráu pola Universidá d'Uviéu desarrollóse na primavera de 2019 en distintes zones del norte d'Ucrania. 

En total, visitaron 21 llamargales nos que tomaron muestres mesmo d'agua, como del sedimentu de les llamargues y del suelu de la contorna p'analizar la composición de les comunidaes de microbios de los trés ambientes. Una vegada nel llaboratoriu, realizaron analisis metaxenómicos y bioinformáticos pa caracterizar la composición y diversidá de les comunidaes de microrganismos de cada localidá. L'estudiu atopó más de 20.000 taxones distintos de microorganismos. Los analises enseñaron que les llamargues de Chernóbil caltienen comunidaes microbianes riques y diverses trés décades dempués del accidente. «La riqueza y diversidá de les comunidaes de microbios nos sedimentos, el suelu y l'agua foi asemeyada ente les llamargues muestreaes dientro y fuera de la zona d'esclusión, y estos parámetros nun se vieron afectaos polos distintos niveles de radiación», apunta l'investigador. 

La composición de les comunidaes microbianes sí presentaba, sicasí, delles diferencies na so composición relacionaes cola radiación, una y bones dellos grupos de bacteries fueron especialmente abondoses nes zones colos niveles más altos de radiación. «Estos microrganismos correspondiéronse, principalmente, con bacteries comunes en redolaes radiactives (mines d'uraniu, zones d'almacenamientu de borra nuclear…). Son quien a reducir l'uraniu y otros metales, y suxeren la esistencia de patrones d'adaptación a radiación a nivel de comunidá nos microrganismos de la zona», comenta Orizaola.

L'estudiu fíxose en collaboración con investigadores de la Universidá de Brown (Estaos Xuníos) y la Estación Biolóxica de Doñana-CSIC. Germán Orizaola lleva años investigando sobre la fauna de Chernóbil y más en concretu sobre los anfibios. L'añu pasáu desveló, por aciu otru trabayu, que les xaronques qu'habiten na central de Chernóbil yá nun son verdes, sinón negres. Los anfibios camudaron el color de la so piel pa protexese de les radiaciones.