Los alumnos del colexu San José de Calasanz tamién aprienden a salvar vides

"Desque atopes a una persona en situación d'emerxencia hasta qu'aporta l'ambulancia, la manera de reaccionar ye perimportante". Son palabres d'Agustina Gil, coordinadora de los talleres sobre reanimación cardio pulmonar qu'estos díes tán recibiendo los alumnos del Colexu Públicu San José de Calasanz, en Posada de Llanera. "Pa impartilos, cuntamos cola ayuda de les enfermeres de los centros de salú del conceyu", apunta Gil.

Más de 200 neños, dende primer cursu d'Infantil hasta sestu de Primaria, tán recibiendo les conocencies necesaries pa poder actuar nel casu de que s'atopen con daquién en situación d'emerxencia. "Facemos el taller completu, dende saber cómo identificar qu'una persona ta inconsciente, hasta llamar al 112", esplica la responsable de la iniciativa. "Una de les coses a tener en cuenta ye que insistimos muncho en qu'apriendan el 1, 1, 2 y non 112, porque pa los neños más pequeños ye muncho más fácil mesmo de recordar como de dicir, y na so traducción al inglés, que tamién ye cenciella, pueden entendete en cualquier país", amiesta.

Los alumnos aprienden tamién a asitiar a una persona en posición llateral de seguridá y comprobar si alienda o daqué ta torgándo-y les víes aérees. Nesti sentíu, la coordinadora de los talleres indica que "el factor sorpresa vien cuando puedes comprobar qu'un neñu de 4 años, por aciu d'una serie d'indicaciones, ye quien a mover a una persona adulta ensin nenguna dificultá". "A lo llargo de los ocho años que llevamos dando estos talleres, los mesmos menores fueron evolucionando y afayando col so llinguaxe les instrucciones a siguir por que sía muncho más fácil de recordar pa ellos", apunta Gil. Finalmente, los neños aprienden a aplicar la técnica de reanimación. "Los más pequeños, hasta terceru de Primaria, utilicen un peluche, pa nun se mancar, y, a partir d'ehí, el restu de cursos fáennlo con un torsu de plásticu", detalla. 

Agustina Gil rescampla la collaboración de la empresa de tresporte sanitariu Trasinsa, qu'emprestó una Uvi móvil y un técnicu, amás de los maniquíes pa practicar la reanimación y por que los menores puedan tamién ver cómo ye per dientro y cómo se trabaya nuna ambulancia. "D'esti xeitu, los neños pueden realizar el taller completu qu'implicaría tolos pasos a siguir nuna situación real desque la persona ta mal hasta que llega la unidá d'emerxencia", fae Gil. 

Esti ye'l segundu añu ininterrumpíu que nel colexu San José de Calasaz tienen talleres de primeros auxilios. La pretensión ye qu'esta iniciativa se repita cada añu nel centru educativu . "La finalidá principal ye qu'ellos recuerden, enfresquen y, en función del cursu nel que tean, puedan dir axuntando más conteníos", sorraya la coordinadora, pa quien "los neños son el meyor vector de tresmisión d'información". Ye por ello, qu'empezar con esti tipu de cursos a edaes tempranes, ye un valor añedíu fundamental. 

Dende'l Colexu de Médicos d'Asturies trabáyase agora por qu'estos talleres s'espardan a tolos conceyos. "Tenemos prevista una xunta cola conceyala d'Educación del Conceyu d'Uviéu, Lourdes García, pa empezar a impartilos de manera obligatoria nos colexos de la capital y dir ampliándolo progresivamente pelos centros educativos de tolos conceyos asturianos", remata Agustina Gil.