Mimos pa la navaya xigante de Taramundi: "Tendría d'aguantar otros diez años"

La navaya xigante del Muséu de la Cuchillería de Pardiñas, en Taramundi, cumplió'l branu pasáu la so primer década d'hestoria y tocába-y pasar por boxes. El mangu, fechu con madera de carbayu, taba yá mui estrozáu y pidía una intervención en fondura, más allá del barniz protector qu'el so responsable, el "navalleiro" Juan Carlos Quintana, y-aplíca dacuando. "Decidimos retirar la madera vieyo y poner pieces nueves nes zones más afectaes, pero, en viendo'l tamañu de la pieza y que ta asitiada n'altor, el trabayu foi complicáu", señala Quintana. La rehabilitación quedó esti día prácticamente llista depués quince díes de trabayu: "Tendría d'aguantar otros diez años".

Esplica Quintana que'l primer problema foi alcontrar madera de carbayu. Dieron con ella en Meira (Lugo), nel taller d'un home que se dedicó munchos años a facer travieses pal ferrocarril. Ello ye qu'una d'eses travieses sirvió pa la zona más ancha del mangu. Una vegada tuvo saniáu'l mangu empezó'l trabayu de colocación de les nueves pieces. "Lo que fiximos ye casi una incrustación pa llograr que la madera quedara más estable. Nun foi fácil porque falamos de tablones de 2,5 metros de llargu y ocho centímetros d'ancho que teníemos d'asitiar nun mangu que, na so parte más alta, ta a 3,5 metros del suelu, asina qu'hubo que mangar andamios pa trabayar", rellata el taramundés.

N'encaxando toles pieces los trabayos concluyeron repintando la fueya y l'argola. Agora namás queda un retoque final, cuestión d'estética, pero tamién una idea pa que la madera del mangu nun s'acuartie col pasu del tiempu. El ferreru Friedrich Bramsteidl, responsable del mazu de Mazonovo, en Santalla d'Ozcos, va facer un cruzadillo de metal asonsañando les decoraciones tradicionales que solíen llevar les navayes nel mangu. "Amás d'incorporar a la pieza un motivu tradicional, el cruzadillo va permitinos reforzar la madera que punximos nuevo. Al ser distinta a la orixinal podría acuartiase o salise col pasu del tiempu y d'esti xeitu va quedar abrazada", rellata Juan Carlos Quintana, qu'espera qu'esta nueva pieza pueda tar rematada'l próximu mes.

La navaya xigante inauguróse'l 7 de xunetu de 2013 y nel so momentu foi considerada la navaya más grande del mundu colos sos 7,2 metros de llargor. Nació como un homenaxe a los cuchilleros del conceyu, pero convirtióse nun símbolu del conceyu y forma parte del álbum de los viaxeros que conocen el conceyu de Taramundi. La pieza alcuéntase nel Muséu de la Cuchillería, un equipamientu pol que pasaron 17.100 turistes a lo llargo del añu pasáu.