Marta Sanz, Myriam Reyes, Igor Paskual y Pablo Moro van participar nel Poex

El Poex algama esti añu la so quinta edición y va facelo cola música como exa temática, y con un cartel nel que van tar escritores como Marta Sanz, Miriam Reyes Cárcamo, Dalia Alonso, Carmen Camacho o José Manuel Mouriño. A ellos van axuntase artistes musicales de la talla de Pablo Moro, Igor Paskual, Alicia Álvarez o Alfredo González, yá qu'esti añu'l lema del festival va ser "Poesía & Música: relaciones cómplices". La otra novedá del eventu va ser l'apuesta por averase al públicu mozu, cola presencia d'autores en centros educativos. 

El festival alredor de la poesía, entamáu pola Fundación Municipal de Cultura y empobináu por Jaime Priede, nació nel añu 2020 al abeyu de la pandemia, polo que los actos fixéronse con llimitaciones d'aforu y potenciando la parte audiovisual, foi creciendo y afitándose, hasta llegar agora a la quinta edición, que se va celebrar ente'l vienres 15 y el sábadu 23 de marzu. Va haber, poro, nueve díes d'actividaes alredor de la poesía, uno menos que la edición anterior, pero caltiénse l'apuesta por espaciar a lo llargo de dellos díes el programa en cuenta de concentrar nun periodu curtiu de tiempu les propuestes como nos empiezos. 

L'Antiguu Institutu va ser l'escenariu principal nel que se van desenvolver los coloquios, alcuentros o recitales. Amás van ser protagonistes los espacios Toma 3 y Llaboral Centru d'Arte, dientro de los alcuerdos de collaboración pa esparder por más requexos el Poex. Otra de les entidaes que se van arreyar pa sacar alantre'l festival va ser la ESAD (Escuela Superior d'Arte Dramático), yá que los sos alumnos van actuar como xuráu del concursu de vídeopoemes que se va celebrar en Toma 3. 

Al igual que, por casu, el Festival de Cine de Xixón (FICX) cuenta con una sección, la de "Enfants Terribles", que busca conectar col públicu mozu, con proyecciones y actividaes pa escolares, el Poex quier romper coles barreres que dixebren a los escolares de la poesía y facé-yos más partícipes d'esta cita. D'esti xeitu, dalgunos de los autores que se van mover a Xixón van tar en centros educativos de la ciudá, pa realizar alcuentros con alumnos, analizar les sos obres y el papel de la poesía. 

Retomando colos participantes, Marta Sanz, Miriam Reyes Cárcamo, Dalia Alonso o Carmen Camacho son dalgunes de el escritores que se van averar a Xixón pa falar de les sos obres y del papel de la poesía. Tamién integra'l cartel, l'ensayista, investigador y cineasta José Manuel Mouriño. 

Tocantes a la música y la so conexón colos llinguaxes poéticos los protagonistes van ser tanto d'ámbitu local como nacional, con Pablo Moro, Alicia Álvarez, Igor Paskual o Alfredo González, ente los nomes más conocíos. Tamién van tar Miguel Rodríguez Monteavaro o Alberto Álvarez Sastre. 

Distintos espacios

El Poex, que na última edición superó'l 80% d'aforu na mayoría d'actos, y que tuvo dellos llenos, va repitir amás dalgún actu en biblioteques, como yá asocedió va un añu, pa intentar tamién averar la llectura a tolos ámbitos. Esa edición tuvo amás como protagonistes a Rodrigo Cuevas y Christina Rosenvinge, dientro de la intención de los organizadores d'intentar romper col prexuiciu de que la poesía ye elitista, una máxima que tamién caltienen agora, con esi pasu más d'intentar espardíse pente'l públicu xuvenil.