Les maquetes monumentales de Roberto Fernández dan la vuelta a Asturies y apunten a Madrid: asina son les sos últimes obres en madera

Munchos vecinos de Villaviciosa yá conocen el hobby de Roberto Fernández y les artístiques maquetes que realizó de los monumentos más emblemáticos de la localidá. Ente ellos, la Casa de los Hevia, el Teatru Riera, la Casa España, l'Ayuntamientu, la ilesia de La Oliva o'l Conventín de Valdediós, toes con madera d'okume. Impecables tamién fueron les répliques d'escultures como la "Asturiana" de Benlliure, o la Esaltación de la mazana” d'Eduardo Úrculo. Unes obres de gran realismu que merecieron el premiu de Cubera o la reconocencia per parte del Conceyu con una esposición na Casa de los Hevia peles fiestes del Portal 

"L'afición pol mundu de les maquetes de madera inculcómela'l maestru artesanu de Villaviciosa Manolo Cuadra, col qu'empecé a trabayar cuando tenía 17 años. Con él aprendí bien dello y de xuru que yera de los meyores tallistes qu'hubiera n'Asturies", esplica Roberto Fernández, que nun pudo retomar la so afición hasta la so xubilación na empresa Nestlé fai 20 años.

Lo qu'empezó como un pasatiempu ta dando llugar a una espectacular colección y nos últimos trés años decidióse por facer répliques de dalgunos de los monumentos arquitectónicos asturianos que más-y gusten. Asina, na so casa puede vese cuasi un pequeñu muséu cola ilesia de San Pedro de Xixón, el Teatru Campoamor d'Uviéu, l'hotel de Reconquista o l'Ayuntamientu d'Uviéu. Otra xoya arquitectónica que causa almiración nos sos estantes ye la basílica de Santa María la Real de Cuadonga. 

Amás de la so afición pola marquetería, ta la de los relieves en madera, con una docena d'obres que rescamplen pola so guapura y coloríu. Ente los sos minuciosos trabayos destaquen representaciones de Cangues d'Onís, el puertu de Tazones, la Selmana Santa maliayesa o les escultures "El Viajero" y "La Regenta” cola Catedral d'Uviéu.

Detrás de la so pasión, escuéndense miles d'hores de trabayu y esfuerzu físicu y mental, pero, sobremanera, de disfrute. “Dedico cuatro o cinco hores diaries a una afición que me relaxa y gratifica, y tengo la suerte de caltener bona vista, pulsu, y muncha paciencia. Pa realizar les obres a escala, básome en fotografíes pa llograr el mayor realismu posible. Les pequeñes pieces qu'asemeyen piedres, ventanales, teyes de cubiertes y otros detalles de cada edificiu tamién les faigo con cartón pintáu a mano. Cada maqueta llévame más de dos meses de minuciosu trabayu", esplica esti autodidacta de 82 años, que les sos obres algamen gran perfección y una total semeyanza cola edificación orixinal

Nestos momentos anda somorguiáu en terminar la ilesia de San Miguel de Lliño d'Uviéu. "Ye una de les xoyes del Prerrománicu, mui guapa de facer", señala. L'artista yá se plantega'l so próximu gran retu. "Encargáronme la plaza de Cibeles en Madrid. Ye un trabayu perguapu, pero al tiempu complicáu y una gran responsabilidá, yá que ye pa unos amigos del mio fíu Manuel y del mio nietu Samuel, que viven ellí. Va esixime un gran esfuerzu, pero faime muncha ilusión", asegura esti entusiasta artesanu de la madera

Lo que quier facer agora ye esponer toles sos maquetes en Villaviciosa. "En casa nun les ve naide", diz esti artista maliayés sobre una espectacular colección de maquetes y relieves que son auténtiques obres d'arte.