Asina ta l'edificiu de Maternidá del vieyu HUCA diez años dempués: abiertu de par en par y esfarrapáu

L'edificiu de Maternidá del antiguu HUCA, propiedá de la Tesorería de la Seguridá Social (TSS), ta abiertu de par en par, con bona parte de la cristalera que funcionaba de zarru estrozada y l'interior esfarrapáu. 

De nada sirvieron les últimes actuaciones realizaes pola TSS na zona, esaniciando places d'aparcamientu y prohibiendo la circulación de los coches. La única forma de torgar l'accesu de los peatones, qu'utilicen esi pasu como un atayu natural hacia la zona alta del Cristu y el campus que s'estiende más allá de Julián Clavería, foi instalar unos cartelos de prohibíu el pasu. Tienen meyor color que los orixinales del hospital, amarellentaos y comíos de ferruñu, pero la vexetación desamarrada del recintu hospitalariu abandonáu yá empieza a comese toa esa señalética. Nengún barganal torga'l pasu per delantre de Maternidá nin tampoco aportar a la entrada per esa característica escalinata. Al llegar a la fin, delles fueyes de la cristalera tán esboroñaes, colos cristales inda pel suelu, y nengún elementu torga l'accesu al interior. 

El hall de Maternidá, los pasiellos y consultes enseñen un estáu d'acabación total. El cableáu arrincóse de les parés, los sistemes d'aire acondicionáu desmontaos, el falsu techu ta estrozáu equí y allá, llevaron los enchufes y hasta los sanitarios de los baños y les tuberíes. Metanes esi escenariu de derrumbe, abonden los restos de botelles, lates y los grafitis inocentes. 

L'edificiu, confirmen vecinos de la zona sollertes al procesu de deterioru constante que sufre tol recintu hospitalariu, nun tien okupas porque diba ser imposible vivir ellí, pero amás de los vándalos que vienen llevar lo poco que puede quedar con dalgún valor los otros usuarios son los yonkis y los grupos d'adolescentes, que dacuando, y vista l'ausencia de torgues p'aportar al interior, tamién empezaron a frecuentar esos pasiellos. 

Delles d'eses pintaes y los restos de lates y botelles abulten nicios de que ye asina. Esos mesmos vecinos indiquen que'l personal de seguridá apenes puede facer nada colos intrusos, cuidao que cuando prinden a daquién dientro nun consiguen que nenguna alministración ponga denuncia, teniendo que dexalos en llibertá y volviendo atopalos al otru día colándose nos mesmos edificios. El control ye inda más difícil porque'l recintu hospitalariu ta conectáu internamente por pasiellos. D'esta forma, señalen estos vecinos, la xente que se mete dientro de Maternidá depués sal per otru bloque. La única solución sería tapiar tolos módulos.