Eugenio Ampudia ocupa'l Barjola col so relatu del cambiu climáticu

Una esposición na que rescampla la relación ente humanos y el restu d'especies, con un mensaxe pa concenciar sobre la crisis climática. Al traviés de delles pieces l'artista multidisciplinar vallisoletanu Eugenio Ampudia amuesa na capiya del Muséu Barjola'l so trabayu "Kilos de oxígeno en la zona de intercambio". "Ser artista consiste en mirar lo qu'asocede al mio alredor, sacar conclusiones y cunta-y lo a la xente que tengo cerca. Y la crisis climática ye daqué que rescampla", destaca. 

El motivu pol que bautizó d'esta manera la esposición ye por contextualizar el procesu natural qu'agora se ve amenaciáu pola crisis climática. "Les plantes apurren osíxenu y amás recueyen CO2. Ye daqué que se produz nel rangu del nivel del mar a los 3.000 o 4.000 metros, que ye la zona habitable pa los seres humanos, y na qu'agora asocede esa crisis climática", cuenta. 

Sobre'l planteamientu de l'amuesa, lo primero que s'aprecia na capiya ye un montón de farina, que como esplica'l so autor "funciona como enerxía, como una acumuladura, y vemos qu'hai un espectador imaxinariu que s'empuerca al pisar esta farina y por aciu d'una videoinstalación van quedando marcaos los pasos, como si daquién los pisara". 

Nel medio Ampudia tien diseñao una especie d'árbol, con palos de deriva que fueron modificándose nel tiempu. "Convirtiéronse en pequeñes escultures y lo que faen ye sostener un pequeñu universu de fueyes de llimonal", detalla. Y finalmente apaez un audiovisual, con un calderu onde hai goteres que caen sobre recipientes, y caúna reproduz una nota musical. "Consiguimos que xurda la ‘Oda a l'allegría’, himnu de la Unión Europea. Sirve pa rescamplar ónde hai goteres, y sírveme pa conseñar de la decadencia d'Occidente", conclúi l'artista.