La XDLA reclama que se complete la normalización toponímica na rede de ferrocarriles n'Asturies

La Xunta pola Defensa de la Llingua Asturiana (XDLA) reclamó que se complete la normalización toponímica na rede de ferrocarriles n'Asturies. Nesi sentíu, criticaron que l'aplicación nueva ConeCTA nun respeta dafechu los topónimos oficiales.

L'asociación recordó al traviés de nota de prensa que dende 2020 presentaron informes y tuvieron alcuentros col Gobiernu asturianu pa tratar esi tema. Una situación que resultó en "avances" como l'usu de la toponimia na mayoría de pantalles informatives y na cartelería de les estaciones. Sicasí, afirmen qu'esi usu ye "incompletu" porque dientro de los trenes, en megafonía, redes sociales, páxines webs y aplicaciones móviles la toponimia asturiana ye "inexistente".

Tamién critiquen que, amás de n'empreses estatales como Renfe o Adif, la mesma Alministración asturiana "nun cumple cola normalización toponímica". Ponen d'exemplu l'aplicación ConeCTA qu'acaba de llanzar el Consorciu de Tresportes d'Asturies (CTA) adscritu a la Conseyería de Mediu Rural y Cohesión Territorial, con un usu de la toponimia oficial "incorrectu, parcial y arbitrariu" y "qu'entemez toponimos oficiales con toponimos non oficiales".

Por eso, l'asociación recuerda que l'usu de la toponimia oficial asturiana ye una cuestión de "respetu a una llegalidá que ta nel BOPA dende hai décades", independientemente, recuerden, de que ConeCTA vaiga tener una versión n'asturianu nos meses próximos.

"Nun se pue sacar una aplicación, una páxina web o un cartelu si nun se revisa primero dalgo tán esencial como'l nome llegal de los llugares", sentenciaron, pa criticar la "desgana" d'Adif y CTA col procesu de normalización de la toponimia asturiana.