Les termes romanes de Valdunu, en Les Regueres, yá son Bien d'Interés Cultural

Les termes romanes de Valdunu, en Les Regueres, fueron declaraes Bien d'Interés Cultural (BIC). El Conseyu de Gobiernu del Principáu aprobó esti día'l decretu que-y da al conxuntu'l máximu grau de protección cola categoría de zona arqueolóxica.

Ye la culminación d'un procesu qu'entamó cola solicitú treslladada pol Conceyu de Les Regueres en 2018. El vistu bonu del Gobiernu rexonal a la declaración como BIC acoyola con "contentu" l'alcaldesa de Les Regueres, Maribel Méndez, y l'arqueólogu que dirixió la escavación de les termes romanes de Valdunu, Rogelio Estrada. "Tien muncha importancia, yá que podrá optase a fondos europeos que tán dirixíos a recursos protexíos", indicó la rexidora. Pa Estrada, "ábrense nueves víes p'aportar a ayudes de más porte pal desenvolvimientu de más investigaciones". Destacó que, hasta agora, "escavóse una mínima parte, alredor de 50 metros cuadraos, lo que se calcula que podría representar el 20% del total". 

El conxuntu termal ta datáu "a finales del sieglu I o principios del II", según les prebes de carbonu 14. La exhumación de les estructures termales romanes fíxose depués del sondéu arqueolóxicu realizáu por mor de la pavimentación de la redolada de la ilesia de Santolaya. 

De magar entós fixéronse trés campañes arqueolóxiques en Valdunu. La primera d'elles realizóse n'atopándose los restos y na segunda, comentó Rogelio Estrada, "avanzóse na escavación de la área". Na tercera afitóse la zona. Ente los restos ta la "bañera romana meyor conservada del norte de la Península", dixo l'arqueólogu. 

La villa romana de Les Regueres inscríbese como Bien d'Interés Cultural

La so declaración como BIC abre la puerta "a remocicar la redolada, a protexer los restos y a ser quien a incrementar les visites", aseguró l'Alcaldesa. Apostó por ponese cola dixitalización, meyorando la información que ta agora mangada. Esti ye'l tipu de proyectos son los que podríen aportar a la financiación de los fondos europeos, dixo Maribel Méndez. 

L'arqueólogu que dirixió la escavación de les termes romanes considera que podría siguise cola intervención nel área porque "falta enforma". Resaltó les sos posibilidaes turístiques, dada la entidá del conxuntu termal y la so situación privilexada, "a diez minutos d'Uviéu y per autopista, menos un tramu pequeñu". "Y col Camín de Santiago a 50 metros", fixo. Ello ye que, sorrayó, yá s'averen "miles de persones cada añu", mesmo los que faen la ruta xacobea y aparen como los que realicen el viaxe namás pa contemplar los restos de les termes romanes. 

La cronoloxía del conxuntu termal llega hasta "avanzáu'l sieglu V o principios del VI". Darréu, habría na zona una gran necrópolis. La entidá de los restos suxure, según Estrada, que "podría tratase de daqué más qu'instalaciones termales d'una villa romana, d'una especie de posada", d'un equipamientu de serviciu viariu próximu a la ruta Lucus Asturum-Lucus Augusti. La redolada de protección toma diez hectárees ya inclúi les dependencies parroquiales, el barriu de La Torre y la fachada d'alliniadura de les viviendes asitiaes al oeste de la carretera local que lleva a Premoñu. 

Los restos atopaos nel recintu de la ilesia de Santolaya axunten la sala de baños calientes y la dependencia templada, mesmo que "otres dos estancies, que'l so estáu de caltenimientu revela interesantes detalles constructivos, del sistema calefactor y de la decoración mural", detalló'l Principáu. La de Valdunu ye una instalación termal típica, que la so distribución espacial fai pensar, amestó, "na esistencia alliniada d'un caldarium, un tepidarium y un frigidarium, trés estancies habituales nos baños romanos". 

Caltiénense elementos constructivos d'interés, como mosaicos o estucaos, recubrimientos con teya, restos pictóricos, murios con pasos de calor o la fístula de plomu de desagüe d'una bañera. Ente los oxetos atopaos a lo llargo de les campañes arqueolóxiques figuren un aniellu de plata y un llote de monedes del sieglu IV dempués de Cristu.

Suscríbete para seguir leyendo