L'IPC sigue n'Asturies nel 6,1%, pero la comida dispárase'l 16,5%: azucre, lleche, güevos y aceite, lo más caro

La inflación aumentó n'Asturies en febreru'l 0,8% en tasa mensual, anque la interañal caltúvose estable nel 6,1%, la mesma qu'en xineru y una décima perriba de la media española (6%), según l'Institutu Nacional d'Estadística (INE). 

Nel conxuntu del país, l'IPC avanzó por segundu mes consecutivu, con una medría d'una décima al respeutive del precedente, una menos de la qu'adelantara l'INE na so estimación provisional. La molición sigue concentrada na inflación soxacente (la que nun recueye nin la enerxía nin los alimentos frescos), que creció una décima n'España, hasta'l 7,6%, y sobremanera nos alimentos, que la so inflación asitió nel 16,6% como media nacional (más d'un puntu percima del mes anterior) y nel 16,5% n'Asturies (frente al 15,3% en xineru).

La rebaxa del IVA nos alimentos foi neutralizada polos efectos retrasaos de la inflación xeneral del añu pasáu (algamó'l 10,2% en xunu n'España y el 11,1% n'Asturies, upada pola enerxía), que foi trescalando dende entós nel conxuntu de la cesta de la compra como fenómenu de segunda ronda, y en particular na alimentación al traviés de los insumos nos qu'incurren los productores. Los alimentos tán recoyendo tamién la consecuencia del alza de los fertilizantes, los cereales, l'aceite de xirasol, el ballicu y otres materies primes por causa de la guerra d'Ucrania, mesmo que l'alza de precios pola escasez causada pola gran seca xeneralizada del últimu añu. 

La esguilada de precios de los alimentos lideráronla n'Asturies l'azucre, con una remontada del 57,4%, siguida pola lleche (35,2%), los güevos (30,9%), aceite (30,5%), pataques (21,2%), cereales (22,5%), carne de vacunu (20%) y llegumes y hortolices (19%). Hai 17 alimentos básicos que rexistren xubes de doble díxitu. En prendes de vistir y calzáu (sobremanera masculines) l'ascensu algama tamién al doble díxitu, al igual que n'artículos non duraderos pal llar. 

La gran aportación a la contención de la inflación xeneral n'Asturies vien de la enerxía y el tresporte, con cayíes del 13,5% na eletricidá, el gas y otros combustibles, del 13,1% nel tresporte interurbanu y del 9,1% nel urbanu, nestos últimos casos por cuenta de qu'apangó'l costu de los combustibles y de les ayudes públiques otorgaes pol Gobiernu p'abaratar ya afalar l'usu de los medios colectivos de tresporte.