El colexu Begoña, un viaxe al infinitu
El centru xixonés encóntase nun proyeutu sobre l’espaciu pa desarrollar competencies: "Xenera un interés innatu"
Nel colexu Begoña, esti cursu, los conocimientos sálense de la órbita. El centru xixonés ta enfotáu nun proyeutu qu’empezó nel primer trimestre y que la so razón de ser ye l’espaciu y, poro, la vida fuera del planeta Tierra. Una iniciativa na que participa tol alumnáu, dende l’escolín más mocín d’Educación Infantil hasta’l más "veteranu" de sestu de Primaria. L’entusiasmu ye máximu. "Hai dellos oxetivos y trabáyense toles árees", afirma Gloria Fernández, xefa d’estudios. Una de les carauterístiques del proyeutu ye la multiplicidá d’árees que s’entamen, lo que lu convierte en "integráu", diz Fernández. Desenvuélvense actividaes de Matemátiques, Llingua o Ciencies Sociales o Naturales.
"Pretendemos que los alumnos meyoren les habilidaes sociales nes esposiciones orales, diálogos o negociaciones", esplica Gloria Fernández, pa la que la llista de competencies académiques qu’adquieren los estudiantes ye bien amplia alredor d’esti proyeutu "espacial". Nesi sen, menta l’arriquecimientu del pensamientu computacional, el resolvimientu de problemes, la planificación d’estratexes, la comunicación o’l trabayu n’equipu y collaborativu. Les materies y propósitos afáyense a cada nivel d’enseñanza. Lo que comparte’l colexu ye la "invasión" de motivos rellacionaos cola iniciativa nes sos aules, parés y sitios comunes. Hai murales y oxetos a escala per tolos llaos. Astronautes, cohetes, planetes o constelaciones d’estrelles conviven nel centru, como na zona d’Infantil, onde’l so alumnáu ta entregáu a la causa. !L’espaciu ye mui motivador y xenera un interés innatu", recalca Gloria Fernández.
Ente otres xeres, los escolinos del Begoña iguaron cuadernos de misión onde apunten les sos esperiencies y disfrutaron d’un planetariu pa ver recreaciones en 3D. Tamién crearon los sos propios cohetes, la parte preferida por Sara Ibaseta, de cuartu de Primaria. "Yeren perorixinales", señala. Al so compañeru, Mateo González, dexólu esteláu’l proyeutu. "Ye mui interesante y prestosu. Gústame muncho buscar información y tengo ganes d’aprender más", comenta. Nel tercer trimestre, la robótica aplicada al espaciu va trescalar nes clases. Endagora, los alumnos aprendieron, por casu, cómo se prepara un astronauta pa viaxar al espaciu n’Educación Física o cómo s’alimenta na asignatura Ciencies Naturales. Y hasta reproduxeron ciudaes d’otros planetes con materiales reciclaos.
"Un colexu ye más qu’una suma d’aules, y hai que compartir oxetivos comunes", reivindica la xefa d’estudios del centru, qu’empondera la implicación del equipu docente pal desenvolvimientu del proyeutu, que, amás, va camudando en función de les conmemoraciones. Mesmamente, pel 8M trabayóse específicamente’l papel de les muyeres nel espaciu y na ciencia. "Siempre facíemos en clas coses sobre l’espaciu, pero esti añu pescancié delles que nun sabía", indica Sara Ibaseta. Julia Álvarez, Lucía Valero, Daniela Osuna, Carlos López y Alejandro Valero tamién lo pasaron en grande inventando les sos galaxes, mesmo que Miguel Leiras, Deva López, Maya Poncela y Julia Escudero coles sos manualidades. El colexu Begoña mira al infinitu.
- Jorge Rey anticipa un verano frío por las cabañuelas: "Agua por San Juan, quita vino y no dan pan" y 140 mm de lluvia
- Buenas noticias para los padres: el regalo de Hacienda de hasta 1.500 euros que están recibiendo en su cuenta
- Adiós a Ion Aramendi tras más de 200 programas: así es Jordi, el nuevo presentador de Reacción en cadena
- Rocío Carrasco celebra su maternidad: "Un sueño hecho realidad
- Canela en Cana', el equipo que consigue arrebatarle el puesto a los Mozos de Arousa: "Ni una, Bruno
- Se fuga de un control de alcohol y drogas de la Guardia Civil en Llanes cuando conducía sin puntos, tras negarse a ser identificado
- Adiós a Cifras y Letras: boicotean el concurso tras la despedida de su concursante
- Sergio sentencia Pasapalabra tras la silla azul de Óscar y priva al campeón de ganar el bote en Pasapalabra”: 1.750.000 euros