Asturies, la comunidá onde más aumenten los cambios de compañía de lluz y de gas

Asturies foi la comunidá autónoma onde más aumentaron los cambios de comercializador d'eletricidá y de gas ente 2021 y 2023, un periodu afectáu pola crisis enerxética desencadenada pola invasión d'Ucrania y nel que se rexistró una fuerte volatilidá de los precios. Nesi escenariu, los cambios de compañía de lluz nel Principáu dobláronse y los de comercializador de gas triplicáronse.

Depués de la lliberalización del mercáu fai 27 años, Asturies siempre apaecía nes estadístiques como una de les rexones con menores tases de cambéu de comercializador d'enerxía sobre'l total de puntos de suministru. Esa fidelidá esanició nos dos últimos años nun contestu de fuertes xubes de los precios de la enerxía rexistraos al calor de la guerra n'Ucrania y tamién de los permunchos cambios normativos qu'introdució'l Gobiernu pa tratar d'apangar la xubida de los precios, sobremanera los del gas. Eses midíes provocaron, por casu, un fuerte tresvase del mercáu llibre al reguláu del gas pa poder aprovechar les ayudes estatales.

Los cambios de comercializador aumentaron en toles comunidaes autónomes y nos últimos años rexistráronse récords, pero Asturies foi onde más se dispararon les cifres, según la Comisión Nacional de los Mercaos y la Competencia (CNMC). 

Nel mercáu d'eletricidá pasóse de 74.081 cambios de comercializador n'Asturies en 2021, a 139.114 en 2022 y a 173.904 en 2023. La medría foi de cuasi'l 135% en dos años incluyendo cambios de compañía dientro del mercáu llibre y tamién tresvases ente'l mercáu llibre y el reguláu, y viceversa.

Pela so parte, nel mercáu del gas pasóse n'Asturies de 20.791 cambios de comercializador en 2021, a 52.698 en 2022 y a 72.616 en 2023. Nesi casu la medría foi de más del 249% en dos años. De los 72.616 cambios del 2023, munchos más de la metá (41.218) fueron migraciones del mercáu llibre al mercáu reguláu, a la tarifa d'últimu recursu (TUR) de gas que puede contratase si'l consumu añal ye igual o inferior a 50.000 kWh/añu y si'l suministru ye de baxa presión. La mayoría de los consumidores residenciales cumplen esos requisitos.