L'horru del futuru discúrrese nel parque de Redes: naturaleza ya intelixencia artificial p'anovar el "tótem" de l'arquitectura asturiana

La revolución tecnolóxica llega a la construcción más tradicional de la cultura asturiana, l'horru. Nel Llaboratoriu Biomiméticu de Llaíñes (Sobrescobio, parque natural de Redes) ta investigándose cómo ufiertar nuevos diseños y estructures a "una arquitectura tan arraigonada". Nun ye namás una cuestión teórica o estética, con diseños inspiraos na naturaleza y trabayaos gracies a la intelixencia artificial. Tamién se quier dar un segundu pasu, construyir estos horros "del futuru", gracies a les novedoses ferramientes y a les nueves tecnoloxíes, "que nos ufierten una nueva forma de facer les coses".

De la basura a la paré de casa: la corteya de castaña, el nuevu aislante pa construcción que s'investiga en Llaíñes

Pasu ente pasu. Manuel Persa, diseñador y Marlén López, arquitecta, trabayen nel conteníu de trés talleres especializaos que van ufiertar esti branu a profesionales del diseñu, la inxeniería, l'arquitectura o la construcción. Nún d'ellos van cuntar cola collaboración del estudiu Arquimaña de San Sebastián, y van centrase nel diseñu y construcción d'estructures con nueves tecnoloxíes. 

Nel procesu de trabayu, tomóse como base l'horru, l'elementu etnográficu por excelencia d'Asturies. La entruga que se facíen yera "¿cómo se puede rediseñar una arquitectura tan arraigonada, tan vernácula como l'horru, coles nueves ferramientes de construcción dixital y ayudándonos de la intelixencia artificial?".

Por aciu d'una serie de parámetros (que fueren biofílicos, ye dicir inspiraos na naturaleza; que cumplieren cola función práctica del horru, l'almacenaxe; o que pudieren tener l'estilu de dalgún arquiteutu famosu ) trabayóse cola intelixencia artificial, "que nos foi ufiertando una serie de diseños bien curiosos, distintos en función de los parámetros que se diben introduciendo y variando". Dalgunos d'ellos recuerden a una seta, "pero ye que l'horru, si te fixes, yá tien daqué forma d'hongu", sorraya Manuel Persa, "intentábemos ver l'horru d'otru xeitu". 

De la teoría, a la práctica. Les curves y llinies estilizaes de los bocetos dixitales pueden ser complexos de llevar a la realidá. Equí entra la "maquinaria de fabricación dixital", una máquina CNC (control numbéricu computerizáu), un tipu de fresadora a la que se-y facilita el diseñu previu y va faciendo los cortes, les pieces. Por simplificar, una imprentadora 3D pa grandes pieces de madera, que puede facer pieces "a la carta". Dexen trabayar con paneles d'hasta 2,4 metros de llargu, magar l'equipu col que van cuntar en Redes va remanar hasta 1,6 metros. Vamos dicir que ye como un "súper Ikea". Primero diséñase l'edificiu y les sos partes, depués fabríquense pa dir montándoles y poder dar forma a la construcción. Esta tecnoloxía "déxate reflexar les formes orgániques de la naturaleza. Facer curves o dalgún tipu de forma especial por métodos tradicionales ye enguedeyao, pero non con esta maquinaria".

Usos

Nun se pretende "romper" dafechu cola tradición, siquier no referente al usu de los horros. "Lo que queremos ye caltener les sos funcionalidades d'horru, anque quiciabes pueda actualizase dalguna, pensando nos tiempos que vivimos. Enriba, el tradicional espaciu d'almacenaxe p'alimentos, embaxo, pa meter lleña. Pero sería interesante que l'espaciu cimeru fuera compatible pa la instalación d'un estudiu, un despachu de trabayu. Y embaxo, por que fuera un espaciu lúdicu, recreativu". Más palantre, cola collaboración que se va realizar con Arquimaña preténdese tamién integrar nel diseñu "estructures tradicionales, como'l cebatu". 

Persa y López tienen claro que'l mundu del diseñu, l'arquitectura y la construcción ta evolucionando enforma. Lo que tán faciendo col horru puede llexase a otros edificios. "Con estes nueves ferramientes y tecnoloxíes, tolo que puedas dibuxar, puedes llevantalo".