Alfonso Zapico reabre la sala del cómic d'Avilés

Alfonso Zapico inauguró esti día una retrospectiva de la so obra na sala permanente del cómic d'Avilés, que reabre les sos puertes. Féxolo pa, según les sos palabres, echar un gabitu y facer d'Avilés capital del cómic. "Vengo d'Angulema que ye la capital del cómic en Francia y vengo a Avilés, que se ta convirtiendo na capital del cómic n'Asturies, equí ye onde faigo les esposiciones más guapes", señaló'l dibuxante que, ente otros galardones, foi premiu nacional en 2012 por "El Dublinés". 

La muestra titulada "Las Baladas de Zapico" repasa la obra del dibuxante asturianu, natural de Blimea. "La esposición ye como si abriera la puerta del estudiu a la xente y tráxelu a Avilés con páxines orixinales, un popurrí d'ilustraciones, d'acuareles que nun suel ver la xente y toi esplicándolo colos dibuxos y testos qu'escribo nes parés; enseña'l procesu de trabayu y eso ye un plus, una visita empobinada anque nun tea l'autor", indicó Zapico unos momentos enantes d'entamar, esta vegada sí, una visita empobinada pa inaugurar la muestra, na que pueden almirase tamién cuatro páxines del so próximu trabayu, que cuenta rematar en dos años y que va tratar sobre l'esiliu republicanu asturianu en Francia y qu'entá nun tien títulu. Esa futura novela gráfica va siguir, en parte, la temática de "La Balada del Norte", la obra estremada en cuatro tomos y ambientada nos tremaos años trenta nes cuenques mineres. 

L'autor confesó que nun-y gusta dibuxar caballos anque, por esixencies del guion, tuviera que facer esi esfuerzu en delles de les sos obres que llucen y enllenen les parés de la planta baxa y primera de la sala del cómic d'Avilés. Obres en blancu y negru entemecíes con otres en color "que ye lo que piden en Francia" y asoleyen títulos como "El Dublinés" y "Café Budapest" onde trata, ente otros asuntos, del conflictu palestín-israelín que vuelve tar d'actualidá polos sucesos de los últimos meses, "El otro mar" o "La ruta Joyce", que ye "cuadernu de viaxes", detalló l'autor. 

La planta baxa de la sala del cómic tien amás noveles gráfiques que Zapico realizó xunto a la periodista y escritora Aitana Castaño como "Los niños de humo", "Carboneras" y "Rastros de ceniza". Tamién acuta espaciu pa otres como "La guerra del profesor Bertenev" que, según afirmó, foi la so primer novela gráfica "como profesional" y editada en 2009.  

La primer planta ta acutada pa los sos últimos trabayos: "La Balada del Norte" y "Los puentes de Moscú" amás de les cuatro páxines de la so próxima obra, entá ensin títulu. Unos bocetos dan la bienvenida nes escaleres d'accesu. Y namás entrar na sala espositiva dos cartelos cargaos d'ironía avisen: "Atención: visitante, nun pierdas detalle d'esta esposición. ¡Quién sabe si va ser la postrera d'un dibuxante humanu que vas tener la oportunidá de contemplar!", en referencia a la puxanza de la intelixencia artificial. 

Y con eses ilustraciones, portaes y más detalles de les historietes de Zapico, como na que figura la entós diputada nel Congresu Mariví Monteserín que-y enseñó la Cámara Baxa al dibuxante. Esti día invirtieron los papeles y yera Zapico quien empobinaba'l percorríu a la rexidora. L'episodiu de Madrid asocedió'l día que Zapico conoció a Eduardo Madina, tamién exdiputáu del PSOE, ún de los personaxes de la so obra "Los puentes de Moscú" xunto al artista Fermín Muguruza. "Esa obra foi mui complexa, fixi una especie de reportaxe periodísticu al traviés d'una conversación nun tonu perpositivu ente dambos", señaló. 

"Las Baladas de Zapico" va poder vese hasta'l 28 de xunetu. N'abril l'autor va participar en talleres con alumnáu de Primaria y Secundaria y estudiantes de la Escuela d'Arte "por qu'apriendan l'oficiu de dibuxante".