Avilés desatapa parte del so patrimoniu arquitectónicu con visites virtuales en 3D

Avilés anovó los sos "totems" d'información turística –dieciséis en total, con ún d'estrena xunto al monumentu de Los Canapés– y cuenta yá con visites virtuales a trés monumentos: la capiella de Las Alas, la ilesia de San Nicolás de Bari y el palaciu de Balsera (conservatoriu "Julián Orbón"). Nel proyectu utilizáronse técniques d'intelixencia artificial pal procesáu y fotogrametría pa construyir los modelos 3D. Pa realizar estos percorríos virtuales ye abondo con averar un dispositivu móvil a los "totems" o escaniar el códigu QR que figura nos mesmos. 

La concejala de Turismu y presidenta de la Mancomunidá Comarca Avilés, Raquel Ruiz, presentó esti día estos nuevos recursos turísticos que yá estrenaron "permunchos visitantes" a lo llargo de la pasada Selmana Santa y fiesta d'El Bollu. La mancomunidá Comarca Avilés, dientro del so plan de sostenibilidá turística, financió estes actuaciones. 

Tolos totems disponen d'información d'interés, mesmo en castellán como n'inglés, lo mesmo que de sensores NFC (d'activación por proximidá de los dispositivos móviles) y de códigos QR (d'activación por aciu d'escanéu cola so cámara) qu'enllacen a información ampliada en formatu dixital agospiada nel portal de la Mancomunidá Turística Comarca Avilés (www.avilescomarca.info). Pela so parte, la empresa Semilla Proyectos foi la encargada d'executar virtualmente'l proyectu de trés monumentos de la ciudá como esplicó esti día Víctor Estrada: "Nel procesu utilizóse fotogrametería pa construyir los modelos en trés dimensiones ya intelixencia artificial por una cuestión de dificultá nel procesáu y tiempos". Nes visites virtuales ye posible visitar l'espaciu escoyíu en 360 graos mesmo que calcar sobre caún de los sos elementos pa recibir información específica . 

"Ye posible ver coses que tando na mesma ilesia o nel mesmu conservatoriu sería malo de reparar, dende una inscripción a una resquiebra pequeña nuna paré", recalcó Estrada mentanto que Raquel Ruiz amosóse satisfecha d'abrir elementos patrimoniales de la ciudá tanto a visitantes como a locales que los desconocen. 

Los "tour" virtuales ufierten, nel casu de la capiella de Las Alas, por casu, información del esterior, l'interior, del escudu y de la amiesta ilesia de San Antonio. De San Nicolás de Bari les imaxes van acompañaes igualmente d'información del esterior del templu, la sala capitular, el patiu interior, la pintura mural o la pila bautismal, que ye un capitel d'alabastru al que munchos espertos señalen como ún de los pocos resclavos del dominiu del Imperiu Romanu nel Avilés de principios de la era cristiana. Raquel Ruiz agradeció, nesti casu, la collaboración del párrocu de San Nicolás, Alfonso López. 

El tercer percorríu virtual que puede realizase ye'l del palaciu de Balsera, tamién conocíu por ser, hasta'l momentu, la sede del conservatoriu "Julián Orbón". Nesti casu puede facese una visita esterior y tamién del interior, onde rescampla la escalera que s'abre en "uve" hacia la primer planta y la bóveda de cristal emplomáu.